منتديات نبع الفرات

تمت ارشفة منتديات نبع الفرات

المشاركات من الموضوع ابيات ابوذيات انشاء الله تعجبكم

  1. بواسطة بهلول الرشيد

    برخه يلتمعط ابروحي وتلهه



    وعكبك بيش تتسله وتلهه
    حما آتونها بشوكك وتلهه
    غضه ونيرانها بانت سريه
    ***
    كصابي افراك خلاني ولحبي
    ممالح غيرهم بالود ولحبي
    شاخص صرت لاخطري ولحبي
    بأملهم وأنتظر وأبطوا عليه


    الشاعر/ الحاج سعود عبد العزيز النفيسي



    يناهي كون شمامه ولجفاك


    بديه وبهذا الساني ولجفاك
    بجميع العلل عذبني ولجفاك
    العلل تبره وجفاك ايعم عليه
    ***
    ماتدري اشجره اعليه وسادي
    اغذاي الحزن وهمومي وسادي
    بكيت افتل حبل وصلك وسادي
    تمت وتكطّع ابتوت البديه






    ***


    يناهي اقبل ارشادي وانته صاحي
    جذب من شاف شخصك وانته صاحي
    وحك سكرة اعيونك وانته صاحي
    رضابك سلسبيل وعذب ميــه


    الشاعر فيصل المشاري


    لنه صدر المجالس والنه دنه


    ولنه الجفنه الوسيعه والنه دنه
    لنه صوله اعلى حدنه والنه دنه
    أبـــــــــــــاة ولاتجد بينه الرديه
    ***
    سفح دمعي على الوجنه محرم
    على اليومه شبه يوم المحرم
    بيامذهب لثم خـــده محرم
    وسفك دمي مباح ابغير ديه
    ***
    اعيونه كبل اشافه شتمني
    انذهل عكلي ودليلي شتمني
    انهجم بيتج يروحي شتمني
    تمنيتي الذي يصعب عليه


    الشاعر الحاج فزيع عوده الخاقاني


    افاعيه على صدره معاجيف


    وأريد الرفجه كلولي معاجيف
    شفت ساعد مع معصم معاجيف
    لجيــــــــن في لجين اشتبه ليه
    ***
    ابي افركجن لما ادميجن يراحاي
    بسبب كل حين تنلجمن يراحاي
    شخصي كلمن ايشوفه يراحاي
    ونه ميت ابسبب فركاك اليه
    ***
    ملوم الدمع عالوجنات لوسال
    جسمي مايفيده الزاد لوسـال
    الشامت موش رقه وياه منسال
    عسى ايكلوله احواله رديه
    ***
    رح نفسك ابسلوه بين خلاك
    ولاتكشف لعند الناس خلاك
    ولو سهم العسر بحشاك خلاك
    الشماته اصعب من اسهام المنيه
    ***
    الفرج منك يلاه العرش ليلاي
    ابسجن وجفون عيني اسهرن ليلاي
    صرت مثل اليفوج ابّحر ليلاي
    مايدري النجاة ابيا نويـــه
    ***
    يشامت حني رجلينك ودينك
    طحت وستافي عتباتك ودينك
    وحك المرتضى حيدر ودينك
    النوب شماتتك حلت عليه


    الشاعر جمعه معيشي الشمري(ابو معيشي)


    ابخدر وصعد عليها ساف من ساف


    وشفت اجعود فوك المتن من ساف
    لها يمة محمــــــد عين من ساف
    ولـــــــــها لحظ اليوسدني المنيه
    ***
    وحك آية عصى موسى وسينه
    الك حثت ركايــبنه وسينه
    الك حسن النبي يوسف وسينه
    الي والجنة الك والنار اليه
    ***
    الك حاجب شوصفنه ولك عين
    ولك بسهام ترميني ولك عين
    ولك هوّد ولك بطل ولك عين
    ولك مو دوم تتمرجح عليه
    خوذوا من درس كلبي على يوم
    وتضل اديارنه لازم على يوم
    اشما طالت سلامتنه على يوم
    على الحدبه انحمل لأرض الوطيه
    ***
    شبجنه ومالويت الترف بالواي
    شكثر كلبي حركله اسلاف بالواي
    مثل أيــــوب يالعشاك بالواي
    على ساعه وتبادرني المنيــه
    بجيت ابدم دمع لرداي يبلين
    على كشح النحيل الحمل يبلين
    وراسك لو اعظام اعضاي يبلين
    بثرى لحدي وهواك امحيط بيه
    ***
    بعد مستنصح الدنيه وليمان
    جزتني وكمت ادك عسمه وليمان
    غريب الشام يرجعلي وليمان
    غريب البالحد ماعاد اليه


    الشاعر المله مسعد الناشي


    حبيبي من زغر سنك ولعباي


    مثمنه اثياب لبسته ولعباي
    عجب تنسه لزم جفي ولعباي
    ونسيت اتمرضعك مابين اديه
    ***
    يروحي لليودج حيل وديه
    اله حني وجثير الشوك وديه
    علي واجب لزوم اكضيه وديه
    الك يلي كثــر فضلك عليه


    وله يخاطب الشاعر سعود النفيسي



    جيب القلم والقرطاس ودواي


    واكتب للوجنته اشفاي ودواي
    انه كل حين اشب يسعود ودواي
    من هظم المصاب الصار بيه


    الملا صالح الحثيل الحربيه.


    اشما اعتب على روحي وداري


    مصيري للعدم تالي وداري
    لابد ماتضل دارك وداري
    ابنزلهن يلعب غراب المنيه
    ***
    متى عيشي يلذ ويطيب ويهان
    اره اليحجي عدل ينعاب ويهان
    حجي الوادم ابهذا الوكت ويهان
    وجه زين اوجه يحمل رديه
    ***
    بسجن من رشيح الدمع يجفون
    الربع بالضيج ماضنيت يجفون
    الردتهم عون الى وياي يجفون
    جفوني ابيوم وكتي ضاك بيه


    الشاعر حبيب العوج الحسيني


    خدك جل نار الورد والوان


    وعليك اهروش كلبي اذبلن والوان
    نوحـــي زاد يامدلول والوان
    يفت بحشاي حن واعطف عليه
    ***
    حزني اعليك مايبطل وناحاي
    اسب اللامني ابودك وناحاي
    تبات الناس مستره وناحاي
    ليلي والنجم يشهد عليه
    ***
    وحك اللي تجلّه ابعرش وحده
    طر كلبي اليسوك الضعن وحده
    انشدك ليش سودك فرد وحده
    سراكم لو تريد اتعم عليه


    الشاعر جاسم محمد الحجامي


    عفاني جيف الي مهجه ولي روح


    اداوي بالعلل كلها ولي روح
    ماني ابحال من يبكه ولي روح
    ابحالك يالكطعت الوصل بيه
    ***
    زماني اشلون بلشني بلاشاة
    اتعب والتعب ضايع بلاشاة
    مثل السرح عد خاله بلاشاة
    يكله اغنيك لن ايده خليه
    ***
    ابحبل اهواك جاتفني وناميت
    كرت عين كل شامت وناميت
    تراني الناس حي امشي وناميت
    سوى ثوب الصبر ساتر عليه


    حسن الشيخ موسى


    احمدني جي لطول العهد ناطار


    ولا حل من حبال الوصل ناطار
    متى يحصل بعد وياك ناطار
    كضه طور الهوى وروحي شهيه
    ***
    تغير عارضي والشيب بيبان
    وتمركز هظم بالدلال بيبان
    انجان النذل عنده باب بيبان
    عند الله الكريم ايعود اليه
    ***
    اهلا يا نسيم الريــح يالماس
    على الشبهوا خده الورد يالماس
    الورد يذبل يصاحب حين يالماس
    وخده اشما اقبله احتمر ليه
    ***
    روحي اسنان المفارك عسنهه
    النوايب ياهو المثلي عسنهه
    اجمال الشالت احبابي عسنهه
    ضلعه ولاتجد السير هيه


    الشاعر الملا جادر حطاب السوز




    علي عزة السلوه من يسلني


    وصديت ابغمد هجرك من يسلني
    شكل عنك الشامت من يسلني
    اجابر والدمع يغلب عليه
    ***
    دنيف امتيمك مايوم بسام
    امغذيني يساهي العين بسام
    من وجدك غديت انلظم بسام
    ابد سم الخياط ايضيج بيه
    ***
    الصبا كوطر ولاينفع نداماي
    تظن ايلين الجاسي نداماي
    يشامت سكنوا الغبره نداماي
    اشبكه عندي وبعد تنشد عليه
    ***
    على وجنات ساهي العين شامات
    مشه ولاتزودت من فيه شامات
    شكول آنــه اذا لاكيت شامات
    انسبيت ابود حبيبي وخان بيه


    الشاعر عباس الحاج اسماعيل


    طبيبي ماتجس نبضي شمالي


    غدت يمناي ماتوصل شمالي
    آنه الجــنت العذيبي شمالي
    صرت شرجي وعلى الوادم اذيه
    ***
    دمه دمــع البيابي سال ونهات
    عليك اكضي العمر حسرات ونهات
    هوايه العذلت الشمات ونهات
    ماخذني الهوه غصبن عليه
    ***
    بعض نوحي الخنسه مالعتبه
    عسى بيت العريضي مالعتبه
    انـــه ويه عدوي مالعتبه
    عتابي وي صديجي الخان بيه


    الشاعر محمد جاسم المهنا



    احاه من يوم المفارك وعلمه


    من اذكره ايطيح من جفي وعلمه
    اليناشـــــدني شكلله وعلمه
    اختنك وحجايتي تصعب عليه
    ***
    فتكت اجروح كلبي والريافه
    ولفاني السكم منكم والريافه
    وين البيه محنه والريافه
    يبين واعرف الذاته وفيه
    ***
    موزر بالهوه مطرود ماشيت
    احمدني وجيف اليه عكل ماشيت
    ارفعني من الدناسه وكول ماشيت
    بيا ميزان حطني تجد بيه
    ***
    هذا البيه جنتم لايميني
    وعذر لافاد بيكم لايميني
    لون تجتف يساري لايميني
    هذاك آنه الهوى غالب عليه


    الشاعر الحاج حسين ياسر العجلي


    كتابك من لفاني اهلال هلكان


    الك ثكله ابضمير احشاي هلكان
    عاشر ذو حسب لوجان هلكان
    يبيس الورد احسن من طريه
    ***
    ناحل وأمشي امكابر تراني
    اجلد خاف عدواني تراني
    تاره الموت يدهاني تراني
    اصحه من يمر شامت عليه
    ***
    العناده طبع للرجال والباس
    اعيّد لو لفاني الكون والباس
    عدوي عيب اطيب وياه والباس
    اعيلن بيه مثل ماعال بيه


    الشاعر ساير العلي



    بريجي اشما احط العسل مربه


    سبب عيني اعله دربه دوم مربه
    يطارش لو وصلت النزل مربه
    ابجي واشتكيله الصار بيه
    ***
    انام وشوك محبوبي يعاني
    افز مرعوب واتخيل يعاني
    هلي الدمع مرخوصه يعاني
    على اللي بالوصل شحوا عليه
    ***
    ترف شوك اليمسني عاد مسلاك
    عفتني لوبعـــد وياك مسلاك
    وحك زلفك قسم للموت مسلاك
    لحيث ايجلجل المظلم عليه


    الشاعرالملا عوده الحمدي



    اشهل غيضه يناهي من كراها


    زعل لو تصد عني من كراها
    جفون العين عيت من كراها
    فلا والله تضوك الوسن هيه
    ***
    كثر نوحي رقيبي كلمني
    ابزعل لن النواهي كلمني
    نظرت الصوج اثاري كلمني
    اواسمهن لمن عمن عليه
    ***
    مدري لاتناشدني على حشاي
    بجيت وصب دمع عيني على حشاي
    تبعت الضعن وجفوفي على حشاي
    شممال الضعن روحي اتميل بيه


    الشاعر عبيد سعيّد الظالمي



    حيلي وشوف البعيني تراداي


    ولاتقبل امــــدنهه تراداي
    طحت ماطحت انه مساير تراداي
    اشعدكم راي يهل النظر بيه
    ***
    اريد الطم وسوي اللطم بلوان
    عليه ويصب دمع العين بالوان
    انه اللي عليه اطبكن بالوان
    شيبي والهوه محرب عليه
    ***
    ريت الموت ألي بهل حال يدنه
    نموت ولانمد للغير يدنه
    لاسيد وكول ابجاه يدنه
    شكل للناس لو مديت اديه
    ***
    تسعر لاهبه ناري ولدواي
    اسجل لاقلم عندي ولدواي
    يكول الله كل داء ولدواي
    سوى داء الكبر ضايع عليه


    الشاعر جاسم محمد السميحي



    حيلي وسمعي وشوفي ترادن


    يخي او وعد المحتم ترادن
    انه اشما جزه من ايامي ترادن
    عليه مسجله طيبه ورديه
    ***
    هله يلي عليك الكلب ليلاي
    ابّجي وبنوح اكضي اعليك ليلاي
    انه المجنون وانته صرت ليلاي
    هايم والغرام محيط بيــــــــــــه
    ***
    نصحته ولانفع وياه نصحاي
    سكاره احنه بهواه مابعد نصحاي
    جفاني وصرت نصي ميت نصحاي
    نحيـــــــــــــــــــل ولااثر نكاد بيه


    الشاعر عجرم بريس الجابري


    هله يلي ابهمي وياي هميت


    عدل وآنه عليك اعتقد هميت
    اشوفك يانفل بالضعن هميت
    وباجر لومشيت اشلون بيه
    ***
    حسافه الدهر بالطيبين بالدار
    كضه وبدل هتيم الصفر بالدار
    راح الحال كلت الخلف بالدار
    اهل هالدار شوشحوا عليه
    ***
    مر دالع عليه اليوم شفتاه
    يبو معيشي من الياقوت شفتاه
    رشف خده ومسك للجعد شفتاه
    الك لو دنتك روحــــــــك شهيه


    الشاعر مطوس فزيّع الخاقاني


    امغيم خاطري مايوم بسام


    وريجي مرمراه الوكت بسام
    ردتك للجروح اتصير بسام
    يطيب الجرح لو مريت بيه
    ***
    حرت مدري شأجبّر بعد شدهان
    جثيرات وعليه صعب شدهان
    شادهني زماني شلون شدهان
    من اسولفهن تشب النار بيه
    ***
    شدك شلطم شنوحن شبجيانه
    على الخده وجبينه شبجيانه
    نصبت اعلى النواهي شبجيانه
    حشت ماحشت ابو ازلوف العذيه


    الحاج وارد حاتم العجلي



    وينه المن كلب ولسان ودلي


    وسولف ضيم كلبي اعليه ودلي
    ابعلات الماي احفر بير ودلي
    حكمك لوحكم ربي عليه
    ***
    شرايك بالأخذ كلبي وفر بيه
    وشوفه اعلى الجمر حطه وفر بيه
    ليش الأضحك ابوجهه وفر بيه
    يحط من الظهر طعنات بيه
    ***
    ابكلبي الزين احطنه وفيلّه
    وسوي اظلال من عيني وفيلّه
    حتى الماألي يوفي وفيلّه
    طبع وياي مدري غشم بيه
    ***
    تكت ابدم دموعي ماشفت لي
    مزمنه اجروح كلبي ماشفت لي
    حكيم الناس كلي ماشفت لي
    دوه ايسكن ونيني الهاج بيه
    ***
    منهو الناح منكم منّعالي
    جرح مزمن ابكلبي منّعالي
    هويت بأرض سفلى منّعالي
    طحت وأوجر زماني حيل بيه
    ***
    موته الحشمت بيهم وناخيت
    وكلبي انعاب من عدهم وناخيت
    دفنها الطين من بركت وناخيت
    اجرهه منين ماضل مكض ليه


    الشاعر هلال حسن وهيب



    رسولي هاك اخذ لي كتاب وياك


    تحله وتقره سر البيه وياك
    اريدك لو صحتله وطلع وياك
    تكله اهلال مشرف عالمنيه
    ***
    العسل بالريج وكت الضيج شراي
    وخاف ايعم على المخلوك شراي
    انجان انته لعند الماي شراي
    جبتلك ماي وجهي ابين اديه
    ***
    مضالي من العمر خمسين عاماي
    مثل مجنون طب وطلع عاماي
    هاي اتكول بويه وذيج عاماي
    من اسلم بعد مامش ذوق اليه


    الشاعر يوسف الراشد


    ولا يوم افتره كلبي ولاساع


    على اللي لاخبر منهم ولاساع
    هواهم داش دلالي ولاساع
    مثل لدغ الأفاعي وفتك بيه
    ***
    راح الفرح من روحي وياهه
    حزن وبنار من وكتي وياهه
    صرت اطلب يخي منهم وياهه
    من الجانوا كبل خدام اليه
    ***
    يصاحب جانت العليه لهلنه
    النوايب عن سوابقهم لهلنه
    ماهن بس علي صارن لهلنه
    جرن كبلي ابيوت الهاشميه


    الشاعر حمدي الحمدي



    عندي ابشخص محبوبي علامه


    من اشوفه جن شمس تضوي علامه
    علامه ايعذب ابروحي علامه
    وهو روحي وأعز منها عليه
    ***
    وهكنه بالموده وأبتلينه
    بأولنه الملامه وبتلينه
    ابد مايوم كلنه وابتلينه
    عهدنه والحيا عدنه سويه
    ***
    هل كعده يلاهي دمهلينه
    وعليها من البيابي دمهلينه
    على هونج يدنيه دمهلينه
    مدام اضعونه انطبكن سويه
    ***
    عكب عيناك ليلي مانمّله
    ذبل عودي ابودادك مانمّله
    عادتنه النوده مانمّله
    سواني اهلي وسراها انتقل ليه


    الشاعر كاظم احمد النداف


    يروحي امن البجي والنوح كفاي


    أبي ولاتنبسط للناس كفاي
    الوصل منك يبد الذات كفاي
    نضح مابالأناء وبان ليه
    ***
    يكلبي انوب حاربهم وعدهم
    هذوله الواعدوا خانوا وعدهم
    جثيره اخوان جانولي وعدهم
    لجن بالنايبه شحوا عليه
    ***
    وحك الماتّخذ مالاً ولابين
    جم سر الكتم كلبي ولابين
    نوايب دهري ماتهزني ولابين
    آنه اشما اناّب صبري ايزود اليه


    الشاعر عباس فرهود السعيدي



    وحك البل قيامه يشفعنّه


    المرض مايوم جسمي يشفعنّه
    اشمريد الدمع جفني يشفعنّه
    يصب حته ابحضور الشمت بيه
    ***
    يصب دمعي على الوجنات عبرات
    وصرت لهل الحزن بالنوح عبرات
    الدنيه اشما اكول اتهون عبرات
    كرب موتي ولاصارت سعيّه
    ***
    تدري انته ولايخفاك بالحال
    محب ماكو يجي من انخاه بالحال
    وشيعه امخلبصه احتاريت بالحال
    لكيت الراس بيه عجدات ميه


    الشاعر الحاج عبد الرسول العامود


    اون حتى عدمت الصوت وبحيت


    الأمر نصاً علي مكتوب وبحيت
    اتعب والتعب لشحيت وبحيت
    يلايم مايفيد اللـــــــوم بيه
    ***
    ترادت حالتي وبين رداها
    سحلت بيلالها وعلست رداها
    هاذي فرصة الشامت رداها
    فرح شاف اليريده صار بيه
    ***
    كثر همي يلاهي النظر عاماي
    ولايخفاك هذا العلي عاماي
    اذا حلمك صدك سبعين عاماي
    انه ابياعام يحصل فرح ليه


    الشاعر ملا صاحب الشيخ جعفر


    حسبات الليالي من كضاها


    ولايخلص شتاها من كضاها
    الرجل لوباع بيعه من كضاها
    كلامه سند عن شهود ميه
    ***
    جروح الكلب من فركاك بابات
    ومن مثلك جذب بهواه بابات
    عند الله عدد سبعين بابات
    عندك باب خل ينسد عليه
    ***
    انته منين ياناهي ونامين
    وجيّة شري برياكك ونامين
    ارخصني بس اطب حضنك ونامين
    اغفه ومن احرج كص اديــه


    الشاعر السيد هاشم السيد محمد الغريفي


    سجب دمعي دمه امغير على الوان


    شطر بفياض من عيني على الوان
    ابي واحــــــــد يجابلني على الوان
    مصابــــه ايكون مثل الصار بيه
    ***
    شروي ابصفحة اكتابي شملها
    تنوح اهل الهوى اشتكصد شملها
    لـــون بالنوح يتلايم شملها
    نحت وانه المراضع تهز بيه
    ***
    يلوم المادره بالروح شبها
    على البحشاي نار الهجر شبها
    بلائي بس بلاء ايوب شبها
    الضرر مسني وعذولي ايلوم بيه


    الشاعر حامد بدر الراشد



    كصه بيه زماني ويلمنه


    يبيني اترك بلادي ويلمنه
    نهيتي شلع كلبي ويلمنه
    ضلوع الصدر لاتسكط بديه
    ***
    شبكه عندي وبعد تنشد يواشاي
    تركت الحيل كمت امشي يواشاي
    تكطّع دامني ونحل يواشاي*
    وأنه ابلجة بحر وتموج بيه
    ***
    ليه يعيون محبوبي ترامن
    نبل والردف من يوزن ترامن
    ميله ابــركبة الناهي ترامن
    جعوده ومن يميل اتميل هيه


    * الدامن والواشي هما ملحقات الشراع
    الشاعر حميد فرهود المغشغش


    كلبي اعلى الونين ادمن وراهام


    وكضي الليل هام اكطف وراهام
    باعوني الجنت بايع وراهام
    وكل مايالهم يكصون بيه
    ***
    جفل كلبي من اخوتي مايمنهم
    بعــد يزي اوكفايه مايمنهم
    عودي الجان يزهي مايمنهم
    ذبل واصبح هتيم اعلى الوطيه
    ***
    وين احباب كلبي وين خلاي
    وين الجانو ايسدون خلاي
    يشامت كون جفك بطل خلاي
    أيــــــــــدك مايبين الخلل بيه


    الشاعر علي فرهود المغشغش



    من مثلي ولاه الدهر ونظام


    وانه حربه ابعدل ماضيع ونظام
    اذا انهج مناهج ضعف ونظام
    الى رهط الأذله الموت اليه
    ***


    كتب الى اخيه الشاعر حميد فرهود يقول:



    ماتدري ابعشاي اليوم يراد


    ودين الناس يابو شهاب يراد
    كتابي اشما اوجهه اعليك يراد
    قساوه اوياك لو نقصان بيه
    ***


    الشاعرالسيد يوسف الكوبع


    يروحي ان صبرتي وأن يرتاي


    هاي ويالنوايب دوم يرتاي
    أكومن ولو جدح الصبر يرتاي
    حيه من شامتي موحيل بيه


    الشاعر حسين علي العيد


    وين الطارش الدارك يمرها


    روحي الشوك لوصالك يمرها
    نارك بالكلب يسعر يمرها
    يضل داوي لما اتعودون اليه
    ***
    لاتسأل اشلون الحال ماحال
    مربعه اديارهم وأصبحت ماحال
    يعود الدهر بالخلان ماحال
    ولاترجع ايام المضت هيه
    ***
    ياهو المثل كلبي والندامه
    على افراك الأحبه والندامه
    الف وسفه عليهم والندامه
    مشوا وفراكهم يصعب عليه


    الشاعر حواس عطشان العفريت


    امكمش ونتخي بعضاي ماهاد


    بحر والروج عني ابد ماهاد
    يهددني زماني بعد ماهاد
    ايهبه وانه البعد هدات بيه
    ***
    نحد بسيوفنه اوبايج حداهه
    وغلبت طير المبركع حداهه
    البــل غير حاديها حداها
    حقود ويطلب الثارات بيه
    ***


    يخاطب اصدقاءه الشعراء:


    الي بحباب كلبي اشكثر منشاف


    وعليهم يصب دمع العين منشاف
    منعني المرض عنكم كمت منشاف
    اليوصلني المضيفي ايمن عليه


    الشاعر السيد علي السيد كرم


    هضيمه اتضعضع من الوكت ويعار


    ولو سهمه يطر الكلب ويعار
    اجابـــــــــر ماأكول آخ ويعار
    وطلعه من الكفه سهم المنيه
    ***
    يدهري معرفت ليلك من اضحاك
    لئيم ومعدنك بين من اضحاك
    يجابلني الحزن مكبل من اضحاك
    ويبدل ضحكتي ابحسره قويه


    الشاعر عبد الحسن شناع الزهيري


    غريب امدوهن ابدنياي ويهاي *


    وردت بس البياض اوماي ويهاي
    يلاهي اشلون اجمع هاي ويهاي
    ابـــــــاة النفس والحاله رديه
    لامن هاي صرينه ولاهاي
    وزيدك زاير بروحي ولاهاي
    ادير ابرحتي وأطحن ولاهاي
    جذب بس لاشماته اتصير بيه


    * نسب هذا البيت سهوا للشاعر حسن خضير القصاب في كتاب محطات مضيئة في شعر سوق الشيوخ

    الشاعر خلف ساجت الزركان



    حسبتك انته لي يمنه وليسار


    من اشوفك يفتره كلبي وليسار
    اشمالك ماخطه جدمك وليسار
    فرد مره عفتني ابغير سيّّه


    الشاعر حسن عبد الهادي الخزاعي


    جفوني ادموعها من دم يرلها


    وروحي دايم ابهمهم يرلها
    الشامت من نظر حالي يرلها
    حسره وكال هاي اكبر رزيه
    ***
    حزينه الروح ماشافت رحلها
    كئيبه وبالصدر تطحن رحلها
    اظن بيّن لها يمكن رحلها
    علايم للرحيل اتشوف هيه


    الشاعر حسن ضيغم شلاش



    مبلل مايهمني المطر منصاب


    ميت مايضرني الطعن منصاب
    هدف وبساحة الميدان منصاب
    ثابت يالتريد الطعـــــــــن بيه
    ***
    وين اللي تشيره ابراي وهداك
    يلزمك مولنص البير وهداك
    مته عهدك بهالي الراي وهداك
    كضوا ياحيف مامنهم بجيه
    ***
    حرت ياراي بيه امشي وشفتي
    صافن واعض ببهامي وشفتي
    يروحي اشكثر خاويتي وشفتي
    بعضهم صار الي الأكثر عليه


    الشاعر حسن مري العطار


    علي مامش فتى بالكون بعداك


    وسيفك يوم اله مشهود بعداك
    اريدن جورتك ماريد بعداك
    من اموتن والكبر يوحش عليه
    ***
    بركت مايفيد السحل والساك
    الوكت طكها على عالي الهام والساك
    النخيته ايشيل حملي طلع والساك
    غزاني ابسبرة النغار اليه


    الشاعرخضر سلمان الحسيني


    شعندك من خبر مكروه ياساع


    تظن كلبي نوايب بعد ياساع
    يايوم استريحن بيه ياساع
    وانه كل ساعه نكبه اتصير بيه


    الشاعر السيد نعمه السيد محسن الجابري

    في رثاء ولده


    دهري فرهدك مني وداراك


    هطرني وهشم الجسمي وداراك
    ثنيتك موحشه ضلت وداراك
    من اصد ليها تشب النار بيه
    ***
    اخلافك لاتظن للجدم عديت
    وانه صبري اعلى صبر ايوب عديت
    اعتقد والله نجوم الليل عديت
    فكدت اجواد وي شخصك سويه
    ***
    الحادي من حده ابنعشك وساره
    دوه جانون بضلوعي وساره
    وحك هاجر اومحنتها وساره
    من اطب دارك يغور الفلك بيه


    الشاعر كاطع المبارك



    اجاد الوصّفك ياترف ليلاي


    نصف عينك نهار ونصف ليلاي
    اليشوفك صار اله بالكلب ليلاي
    بسبب مالك شبيه اعلى الوطيه
    ***
    من دمعي توازه البحر وشطار
    على الساكن بأرض الكوت وشطار
    آنه الجنت ابو عقلين وشطار
    تهت وهل البلد شكـّـوا عليه
    ***
    البايج مايفيده الجرخ والحاد
    اله تفصال نوم الكبر والحاد
    اسف نسل الأسود البوم والحاد
    مسكنها الخراب اوتجن هيه


    الشاعر خلف ساجت الدجين



    نشف نهري وبعد باليود شملاي


    تهت مندل جنوبي اوين شملاي
    اكتمت سري الواشي خاف شملاي
    خــبر ويشيع يأثر خلل بيه


    الشاعر مله جاري كريم الحسيني


    حرت شكتب ابخط العتب وتلاه


    وعيني ماتنام اللـــــــــيل وتلاه
    كضيت اول شبابي ابقهر وتلاه
    امـــــــــوت ولاهلي يدرون بيه
    ***
    بدا بجسمي التنازل ونحولي
    بسبب ربعي جفوني ونحولي
    يصب دمعي يصاحب ونحولي
    اذا عندك علي غيره وحميه


    الشاعر عميته الجار الله


    اسد عبره وتطير اشكثر عبرات


    النوايب من تصيب الغير عبرات
    السفينه اول شبابي اشلون عبرات
    اخـــــــــــــير الشيب تشله بالثنيه


    الشاعر مله دايش ساهي الخفاجي


    انحلـّت كارتي وشمات حالاي


    وعلي تفصال ثوب الحزن حالاي
    يصاحب كوم دير وياي حالاي
    الولتني انذال جن مطلوب ديه
    ***
    اباري للضعن لاوين ويهاي
    وكلبي امفارج الأحباب ويهاي
    صدك ترضون يكضي العمر ويهاي
    التسوي العسل مر وسموم حيه


    الشاعر مزبان شحيّن


    جم الناعور دمع العين لوهل


    لبو حاجب شبيه البدر لوهل
    لابيه ابتشر يعبيد لـــــوهل
    اهو المدنف ونه النيران بيه


    الحاج عبيد الطبيلي / مجاراة البيت السابق


    غاب البدر خده ياضعنّه


    وعلى فراش الموده ياضعنّه
    مدري اتبع ضعنهم ياضعنّه
    والأحسن نطبج وياهم سويه


    الشاعر حمد ابراهيم الزركان


    دوري لاتعلي الصوت يرحاي


    كبر ماشوف يزغر بعد يرحاي
    كافي النوب الزمي الصبر يرحاي
    اكتمي خاف شامت يمر بيه
    ***
    اون والدارس ابكبره نحالي
    غيار ابلوني يالمنك نحالي
    صوارم دهري دلالي نحالي
    ابقساوه ولاأرى عنده حميه


    الشاعر ياسر حسين الشويلي


    شفت دمعي على الخدين ياره


    ايحمد ربه الأخوه ايصير ياره
    العمل ذره من الخيرات ياره
    اعملت خير وطلع مكروه اليه
    ***
    عضيدك لاتبيعه بثمن وشراه
    لسانك لاتطولّه وياه وشراه
    هوايه اعتاب الي وياك وشراه
    اثدي واحد رضعنه احنه سويه
    ***
    مثل ماشم الك ياخوي شملاي
    انت عيني ويميني وعضد شملاي
    آنه اشماريد اجمعه وياك شملاي
    تشظ عني وتشمت اعداي بيه


    وفي البيت التالي يدعو ربه ان يرزقه ولداَ بعد سبع بنات


    انه كاتم يرب سري ولدلاي


    انه ماكو خصم عندي ولدلاي
    انه طالب يرب منك ولدلاي
    حيا لذكري وسعاده ايصير اليه


    الشاعر حسين الركابي


    الطيب لاتظن يرتاح ويعين


    ولاواحد يعدل الحمل ويعين
    اليسمع وجع بيك ايكول ويعين
    بخوي ولايصير الوجع بيه
    ***
    اخذت من الزمان ادروس وعبار
    وبنيت احمول لجل الصبر وعبار
    النهر مادام ضيج كوم وعبار
    كبل مايتسع ويزود ميه
    ***
    العذل لابدلاني اعليك لادار
    ولابيعك ابصافي الذهب لادار
    ثديها امي يريته كون لادار
    درت وجهك عرفت العوز بيه


    الشاعر جبار السيد شعلان الموسوي



    انعاب ومايفيد وياه كلفات *


    وكتنه ولاتظنه ايعود كلفات
    الرجل لابد تمر عليه كلفات
    تبين معدنه وتظهر خفيّه
    ***
    وحك البل نجف تلمع بنيته
    لخوتي الساس بجفوفي بنيته
    يثاب المــــــرء عد ربه بنيته
    وعسير احسابه اذا نيته رديه
    ***
    جنان الخلد كربك وانته حربه
    وسلمتك دليلي وانته حربه
    اريد الزم العاذل وانته حربه
    ولو ادري بجهنم مقر ليه


    ·الشطر الأول مدور ، وفيه يصف الشاعر وقته كالسفينة التي تعاب ولايفيد بها التصليح كوضع القطن والزيت في فتحات بدنها
    الشاعر جبار حسين اللامي


    متى كلبي ينام بليـــــل ويعان


    جسمي وكل عظم بعضاي ويعان
    وينه الكلفيته ابحــــــمل ويعان
    ايتوكه ايخفف اهمومي العليه
    ***
    بسك لاتناشــــدني علاماي
    اون شبه الكطه الضامي علاماي
    الــي برسوم محبوبي علاماي
    اليوم اصبح يضيع العرف بيه


    الشاعر كاظم محمد العمود


    اضلوعي والحدرهن يالمني


    وأظن عكلي يصاحب يالمني
    على اعيوني سطرني يالمني
    الغريب اشلون مايشتمت بيه
    ***
    عليمن تنفش بريشك وينحاك
    وتكول الماي اغزلنه وينحاك
    التبر بس ينجلي مره وينحاك
    وانه اجلي بيك كل صبح ومسيه


    الشاعر ستار دلي الحجامي


    الدهر مايبس اجفوني وشرهن


    وطحت بالغاسق الواقب وشرهن
    رهنت الروح لودادك وشرهن
    بعد بس كاع كبري او موش اليه
    ***
    اظل للموت احبنك وريدك
    وعسى دمي دخل يشكر وريدك
    حياتي وموتي يمعود وريدك
    تمدها احيا تخليها المنيه


    الشاعر فاضل خضير السويدر
    كتب في فقد ولده حسين عام 1982 يقول:



    امسى اغفر عليه النزل وحشاي


    سبب سباح كلبي انكطع وحشاي
    احس نيــران بالدلال وحشاي
    اسعرت من يوم فركاكم عليه
    ***
    عمل بيه وفضحني الدمع منسال
    وذبل جسمي وشبيه العود منسال
    منهو اللي انشده اعليك منسال
    بهيمه ولايمر كل عرف بيه


    الشاعر ماجد مفتن السفاح


    قفل بيبان كلبي سكراني


    صحيت ومن رضابه سكراني
    اخبرك صاب جسمي سكراني
    ابحلاة اشفايفه العمت عليه
    ***
    طحت والجنت اظنه ايعين ماعان
    ولاجنه ربينه ابفرد ماعان
    اكل للكلب عن ايكول ماعان
    لمن حيث الأوده ايعود اليه
    ***
    عكلي الثابت ابراسي شياهام
    او ربعي اتفايطوا عني شياهام
    اهم من بلوتي عدهم شياهام؟
    نحط ونشوف ياهو اعظم رزيه


    الشاعر حافظ حسن مري العطار


    اشمعد ايام عمري ونسعدهه


    وكولن وين عزها ونسعدهه
    عجيبه الناس تضحك ونسعدهه
    بطر لو من سفاهه اضحكت هيه
    ***
    صافي سماي وأهلي عيروني
    يحيف ابوزن ناقص عيروني
    المشت روحي وراهم عيروني
    المشت جدام حطوا عيب بيه
    ***
    يعذبات اللمى يابيض ينحاف
    ليش اللي ابهواجن دوم ينحاف
    اشعوزه الكمر وجهه ابخيط ينحاف
    ويحف ببتوت كلبي وعمل بيه


    الشاعر احمد جاسم السماك


    شفت فركاك والغربه سوادين


    سواد الليل وغيابك سوادين
    انه روحي نقد ادفع سوادين
    لليكــــــدر يجيبه ابحلم ليه
    ***
    نطرتك يوم جنه ازغار ويهال
    ولك سايات منها الدمع ويهال
    بدر وتنطرك بالليــل ويهال
    تضوي الروح والظلمه العليه

    سليم جبر السعداوي
    صفنت ألها وضربت اخماس بسداس
    وتعبت اعله البنيته اوياك بسداس
    صحيح انته لعبت وياي بسداس
    أغلبتني ابطيبتي العمت عليه
    ***
    يدنيه اتوجي ابفولج وربعي
    ونهشي ابلحم ذرعاني وربعي
    الوكت مابيه بعد ربعك وربعي
    الأخو صار ابوكتنه ايبيع اخيه