منتديات نبع الفرات

تمت ارشفة منتديات نبع الفرات

المشاركات من الموضوع آنه وياك وصفنتي وآخر الليل

  1. بواسطة بهلول الرشيد

    فالح حسون الدراجي


    انه وياك وصفنتي واخر الليل
    نتحاسب عالسهر والهم والذنوب
    ومثل اخر جكارة باخر الليل
    نفس نفسين روحي وبيدك تذوب
    اگعد من عليك باخر الليل
    اذا تبچي الشمس لو طاح الغروب
    وافزز من عليك بهدة الليل
    اذا من غير فزة الكون مرعوب
    واصحي من عليك بوحشة الليل
    اذا حتى النفس جحّل بالگلوب
    واحشم من عليك بعضة الليل
    اذا كلشي بزمانك صار مچلوب
    شسوي شبيدي شكدر كلي ياليل
    اشو عنتر زماني يصير يا ليل
    عليه وعالشديد يصير شيبوب
    انا مناكت گصب ومواكح السيل
    وعلى مچافت زماني رويحتي تذوب
    يركضني زماني بمركض الخيل
    وبعد ما اطيح يسأل: خو ممتعوب؟
    اذا غالب يردني باخر الخيل
    واذا مغلوب شحچي وانه مغلوب
    يجويني الزمان بماشة الليل
    ويناشدني بصلافة اتوب؟ ما اتوب
    انه شسويت حتى نتوب ياليل
    شو ارغب ملاحة وطبعي محبوب
    واذا ذنبي السهر معذور ياليل
    لأن بس الدجاج ينام الغروب
    واذا ذنبي الشعر محسوب يا ليل
    الشعر من الولادة بگصتي مكتوب
    ثگل هم القصايد يهدم الحيل
    وعساه بقلم شاعر حاسدي يلوب
    واذا ذنبي الشرب محسوب ياليل
    اگولن أي نعم اثام وذنوب
    لچن شربي نبيذ الشمس ياليل
    وهم تحسب عصير الشمس مشروب
    انه شعندي رصيد؟ وشتدري ياليل
    رصيدي من المحبة مترس جيوب
    انه لساني العفيف منگع بهيل
    وانه الطيرة التنام بفي الحبوب
    وانه العود الرقيق ال بلهوى يميل
    اذا اسمع قصيدة رويحتي تذوب
    جاراتي خواتي وحامي دخيل
    ما وصخت نفسي وشلت مذبوب
    والبيت الاطبه يصير ياليل
    مثل جامع اقدسه ودوم مهيوب
    ومثل گلبي هذني شفافي ياليل
    وقالب للشرف من عندي مصبوب
    وهذن ايدي علي شهود ياليل
    ما جسمن جسم غالب لمغلوب
    ولا اريدن جدح عطشان يا ليل
    رغم عمري گضيته دوم منهوب
    اعاند؟صح اجادل؟صدك ياليل
    واذا رادت صبر تلگاني ايوب
    لچن هذا الوكت چالذيب ياليل
    اذا تسكت عليه تعيش مسلوب
    وحلاتك بالرجل چاكوچ يا ليل
    ولا يگضي العمر سندان مگلوب
    العمر يگضي العمر ويروح يا ليل
    ويظل اسمي شريف بكل الدروب
    انه بگلبي شعاع ايمان ياليل
    وكل نبضة بوريدي تمسح ذنوب
    واذا انخه علينه بيوم ياليل
    تخرس المنايا وتنجلي النوب
    واذا ضكت عليه الباب يا ليل
    دمعة عله الحسين تفلش البوب
  2. بواسطة امل

    شكرا اخي ع الاختيار
  3. بواسطة بهلول الرشيد

    تسلمين امل
  4. بواسطة نجلاء على

    رررررررررررررررررائع