منتديات نبع الفرات

تمت ارشفة منتديات نبع الفرات

المشاركات من الموضوع ابوذيات، اكبر موسوعة للابوذية، ابوذيات عراقية، ابوذيات 2017، اخلى الابوذيات

  1. بواسطة مرتجى العامري

    السلام عليكم ورحمة الله وبركاته



    بعض الابوذيات اتمنى ان تعجبكم



    *******************

    ريد اغفى على ذراعك وانامن
    كضينه الحب تمن انت وانامن
    وحك عيناك نسيت اسمي وانامن
    تهت ارجوك دليني عليه

    غرامك بالكلب حافر وناقش
    يلصرت نيران تحركني وناقش
    اريد اكعد وياك ولك بس احجي وناقش
    واكلك لشوكت تقسى عليه

    صديجي الجان رايدني واريده
    رخص دمه وكطع لأجلي وريده
    صديجي الجنت أحبه وريده
    شماله شوكطع وصله عليه

    أنا بيدي وتد بالكاع دكيت
    ولادكة نذل بالناس دكيت
    بعدني وماطح بالكاع وانت طبول علي دكيت
    ولك شد وصله وبعد إركص عليه

    حبابي وأعزمن صحتي صحتهم
    جفوني ولاضمائرهم صحتهم
    بيدي أشرت وبلساني صحتهم
    شافوني وسمعو ومحد فزع لي

    صدى حبك بقلبي انتة وانته
    وترى كلبي ونينة انتة ونته
    احب خمسة بحياتي انتة ونته
    وحضرتك وانتة نته وهاي هية

    ألح عالكلب مايقبل ملاحه
    على البالكون مايوجد ملاحه
    همش عالعنب جفي ملاحه
    كلت حامض عنب غصبن علية

    هاك خيوط روحي هاك أبرهة
    ولو صاير بحرها هاك أبرهة
    ألك حصرة بدليلي هاك أبرهة
    علي ثكلت مثل ثكلك علية

    سهام عينك بكلبي حيل شرعآ
    وسفن حبك بخليج الروح شرعآ
    ردت مذهب يحلل بوستك شرعآ
    واذا ماكو اردن للجاهلية

    ذبت وبنار حبك مايع اني
    وتركت كلبي يعاني مايعاني
    لون تعطش رويتك ماي عيني
    واحط الروح لعيونك هدية

    احبك اكثر من الكون ونسه
    وعندي الموت اذا يرضيك وانسه
    ما افارك ابد ذكراك يوم وانسه
    واقدم روحي لعيونك هدية

    سكر عسل كل منظاك نفسك
    واكوغيرك حلو بس ماكونفسك
    تمنيتك حبيبي تبوس نفسك
    بس بداخلك تنويهة لية

    عليك الليل صدك انه آوانه
    ومعاك العتب هسة آن آوانه
    تهدد بالنفاهة آنه وآنه
    وبالشدة تكول انة شعلية

    بسناسل حيل دهري سلسلاني
    والا من ربعي واحد سلسلاني
    يخلي فراك وجهك سلسلاني
    الفظل للثوب ضل ساتر عليه

    شتظن كلبي يكتب وصل ليــــــك
    وبعد لاتصل يمي وصل ليــــــــك
    بعد شكثر اصومنك وصليــــــــك
    واكفر لو زعل كلبك عليــــــــــه

    نوح وغير نوحي مانساني
    وبالشده يصاحب مانساني
    بعسر حالي وحمده مانساني
    الباري وبس أله مديت اديه

    دليلي شكثر من فركاك عانه
    ولا صحله صديج بيوم عانه
    هواي اصحاب مايسون عانه
    وقليله امثالك العدهم حميه

    نكرتني والدليل التهب ويذاب
    وخصمي وياك خصم الشات ويذاب
    صبحت مثل اليسوي زين ويذاب
    بشط ولاربح من كل قضيه

    ساعة الوكت مشراكة سعافاي
    وعلي بجفاك ماتلحك سعافاي
    جنت نخلة ويفيلهم سعافاي
    وعلى كرصة خبز جيموابيه

    كب شخصك مصايب كون صفن
    شحارب والشماته هواي صفن
    يهل حسنك تراه اسلام صفن
    صافن والاسلام تلوم بيه

    دحوك بثوب حسنك ونسجنه
    بجهنم حبك ارضى ونسجنه
    انحبسنة بقفص عينك ونسجنه
    وتحط رمشك كلبجات باديه

    نطرتة يلوحش خصك علي ما لاح
    وكصر حبل المودة اوياك ما لاح
    شحط فوك الملح ويصير مالح
    ويغزر بالاوكلة بذن ايدية

    عيوني من القهر تلفن وصدن
    لو يعمن فلا اعوفك واصدن
    اصيرن حارس بحلكك واصدن
    شرط ماخلي بوسة اطب علية

    خطوني وأثرو بيه ولاحوك
    وكلت ماريد درجاتك ولااحوك
    لأن ماظل بعد فارس ولا حوك
    اليجيب هواي ويردة الية

    احبك ولمحبتي ليش تنكر
    ويلتكرني يجيلك يوم تنكر
    راح اشرب عرك بجفاك تنكر
    وبطل شيفاز العوازة الية

    ردت كلبي يتكطع بك ويهلاك
    ناس بوجه وانتة جم ويه لاك
    عجيبة من صرت ضدي وي هلاك
    عصابة ودرتو شو كلكم علية

    حياتي الحلوة من بعدك شمرهه
    وعيني بنار هجرانك شمرهه
    روحي الطف صفت وانتة شمرهه
    وتضحك جاي جايبلي المنية

    يگلبي بيش اخيطنك ولحماك
    ولا واحد شگف عنك ولاحماك
    يجيك الضيم من دمك ولحمك
    من اقاطعهم تلوم الناس بيه
    عبد الواحد الهلالي

    اشد الها تگلي الدهر واطاك
    غرفلك هالكريم بحسن واطاك
    لون ايدي تشل عليك والطك
    اعلمك ما جره منك عليه

    من مثلي تعذب من تمرمر
    اشتحمل الدك يگلبي من تمرمر
    تخطف گلوب بيدك من تمرمر
    طريجك سلطة الباري عليه

    تهزهز يا لحد وانفض ترابيك
    وعزيز الروح هالنايم ترابيك
    يباچر عيد وعيوني ترابيك
    دضل بنومتك والنوح اليه
    هاشم فليح – شطره

    بس انه زماني وياي خوان
    خلاني وحيد بغير خوان
    وانتچلت على الصديق وطلع خوان
    يحاول يسلب اهدوم العليه

    ذلولي ما يجد للسير ضلعاي
    انتحوا عني ومد البصر ضلعاي
    شبه كسر الزجاج انكسر ضلعاي
    بعد ما يرهم التجبير بيه

    صوتي من نداي عليك ينباح
    وسرنه لا تضن للغير ينباح
    اتوده ليش يطلع چلب ينباح
    تحذر لا يغدرك بالثنيه

    احبابي شلون حالتكم بعدنه
    اشبيدنه والوكت عنكم بعدنه
    اچان انتم سلييتونه بعدنه
    بذكركم كل صباح وكل مسيه

    دليلي انزرف من الاه وانسه
    شمشله يعرض ويه الخيط وانسه
    يگلبي جوز عن اهواك وانسه
    اشلون انسه وتصاويره بديه

    عشرتك خوش للصاحب ويازت
    الزواني لا تدك دكتك ويازت
    فلانه من الخزي عفت ويازت
    وتزيد انت عليهه القاط ميه

    يحادي الضعن وين تريد ولميت
    واخاف العزيز وياك ولميت
    اچان اتريد وتولمت ولميت
    بعد ماضل الك كل حك عليه

    تجي بطروشنا طروشك حيينا
    عزيز ومن تجي لينا حيينا
    تموت انموت ومن تحيا حيينا
    تصحا اصحا تمرض مرض بيه

    حرت لا وين وجهي ووين مگفاي
    على الخله دموع العين مگفاي
    يگلبي لو احط الترف مگفاي
    للمعشر ولا يصعب عليه

    مسحت الدمع باليمنه ووحنت
    ذكرته وضجت ضلوعي وحنت
    الناگه تعلمت مني وحنت
    مثل گلبي گلبهه انصدع هيه

    شحم چلاي ذوبته من الحاي
    وغدت سوده مراكبهه من الحاي
    اجيت اتبع صفاينهم من الحاي
    غدت شمس الضحى ظلمه عليه

    المحبه ركزت بيه وعامات
    وسهم الچبدتي تصابه وعامات
    الي خالات خل يبچن وعمات
    وعلي لاتطب تبچي الاجنبيه

    لا عن طمع خاويتك وانه خواك
    اطيحن باول صياحك ونخواك
    ان چان انت خوي ليه انه خواك
    ردتك للصدگ وانكتت بيه

    الدنيا وياي زعلانه وانه الها
    تبالي الدوم راعيهه وانه الها
    وحگ سادة بني هاشم وانه الها
    مگولن اخ لو تنجلب بيه

    حلو لا مستوي حبي ولا ني
    ولا عود اليسليني ولا ناي
    العگد ضيج مفر مالي ولاني
    دعلج ونفض ريشه عليه

    ترف طولچ يعود الموز وانتي
    ويشوكج بات بالدلال ونتي
    يحكلي وياج اكظي العمر وانتي
    جسم واحد وروح البيج بيه

    وين اللي يصدر العيس لاميت
    انشظى عگلي وعلي الناس لاميت
    اريد اصبر واشوف الصبر لاميت
    الصبر اثر اخزانه وعمل بيه

    عيوني من سبب فرگاك حايات
    مغذيني هواك اسموم حايات
    اموت ولا اطلب من النذل حايات
    علي بيت المرد عيني جويه

    غريبه امها يصاحب وابهمنا
    شعاع البدر خدها وابهمنا
    انا ماريد عشره وابهمنا
    عشرتك بالدقايق تمت بيه

    حبيبي التين والزيتون وازهى
    وشبه شجرة ربيع السنه وازههى
    حضرها الواشي والنمام وزها
    خله ابكل طويله نار السريه
    عيدان

    روحي والهوى ودنياي واعداي
    لامتني جميع الناس وعداي
    اريد اصبر واشوف شلون وعداي
    واشوف العاقبه شصير بيه
    عيدان

    اعيونه گبل اشافه شتمني
    ويعگلي الچان ثابت شتمني
    انهجم بيتچ يروحي شتمني
    تمنين الذي يصعب عليه

    وين اللي يميز الحجي يزنه
    نححجي زين يطلع شين يزنه
    السله تريد ومن العنب يزنه
    يصير اثنينهن يرحن عليه

    عليك البس هدوم الحزن واحد
    عزيز انت يهالنايم واليعز واحد
    الناس تمشي وتودع نعش واحد
    وانه ودعت خمسه وماردوا اليه
    سامر

    يوصفون العوارف شجر من شاف
    على اطرافه يموج السيل منشاف
    اكلنا التمر والغصن منشاف
    ميت لا شاف شمس ولا وطيه
    حسين الغالي

    الدجى چلچل على جسمي وجله
    انكشف رحل الصبا وجه وجله
    عزت قدرة الباري وجله
    خلق بلقيس وولفي سويه
    حسين الغالي

    وحك من صور الحاجب والعيون
    لاجلك لاسكن البيده والعيون
    وخزن جرح دلالي والعيون
    يهلن كل صباح وكل مسيه

    وحگ شفتين محبوبي وسنه
    وعلى حالي بچت شيعه وسنه
    لجر سيف الهجر لجلك وسنه
    واحارب كل عدو يعاديك اليه

    اريد اصبر وشوف اشلون وعداي
    طحت بمرض مرض ايوب وعداي
    اخبرك يا حبيبي گرب وعداي
    البگه براسك هواك العم عليه

    حسن يبني تلگه الضيف حي بيه
    وعسى زاد الغديد سموم حي بيه
    ياهو الجمع ماله وراح حي بيه
    سعيد الحفظ عرضه من الرديه

    اخوتك لا تعاديهم ومرهم
    وطيع الكل ارادتهم ومرهم
    همه الدوه لجروحك ومرهم
    همه حزام ظهرك بالدنيه

    سره ضعن الاوده بليل ياشال
    ويرد سباح گلبي يرد ياشال
    شوگع منه حبيبي وصاح ياشال
    والنعم منه فلا تحصل رديه

    وحك اللي وگفله الطير واحماه
    ومن نحره يفوح المسچ واحماه
    شفت حي دخل عالميت واحماه
    كتل ربه ولا منه خطيه

    وحگ اللي طعم للطير وذره
    ومن نحره يفوح المسج وذره
    شفت حي دخل عالميت وذره
    كتل ربه ولا منه خطيه

    لابد ما الك عالدار مرات
    واخبرك بالليالي شكثر مرات
    مو مره خنت وياي مرات
    وعندك امل تعود اليه

    اخوتي الچنت اودهم دوم يمناي
    عگبهم ما تهوش اعداي يمناي
    گمت اصفج يساري فوك يمناي
    على ابن امي السره تحت الوطيه

    غذاي الصبر والحنظل لهاماي
    تشب النار من جدمي لهاماي
    وين اليمله الجربه لها ماي
    يطفي النار البگلبي السريه

    همت بالبر يسار امشي ويامن
    وراح المفرح كليبي ويامن
    ويباجي العمر وين اگظي ويامن
    گظيته بذل يلاهي التفت ليه

    وحك راس النبي والحسن والحاج
    وعلي نكبات دهري رواف والحاج
    يشامت گوم شب نارك والحاج
    وخلي شما يصير يصير بيه

    علي دگي يوالدتي وناحي
    ذبل عودي الچان يزهي وناحي
    لا تفرح يهالشامت وناحي
    افرح لو سره الجناز بيه

    الدهر طگني بهامه ولاخر
    صب دمع عيني ولاخر
    صرت مثل العبرت واحد ولاخر
    حالت بينهه وبينه المنيه

    اشير على الرجال وعلي منشار
    وضلعي ما يگصه اثنعش منشار
    وين اطير وين تحط شركي عليك منشار
    الزمك لو الك جنحان ميه

    من سابگ تخالف شور منشار
    واحنه اللي نگص بالجدم منشار
    الحر مايلزمه الشرك منشار
    يطير ولو حوه الجنحان ميه

    يعت بيه الدهر مرات وانعيت
    وعلى ضعون الجفتنه صحت وانعيت
    يهل الطير البچيت الربع وانعيت
    نعاك اللي نعاني اعلى الوطيه

    انه الگايم لعد گومي ونخواي
    وبيهم ما نفع صوتي ونخواي
    الناس تلوذ باخوتهه وانه خواي
    اگطعوا ما گطعت الشمات بيه

    شربت التتن وانشبلي سعالاي
    مريض ومحد امن اهلي سعالاي
    نخيت امن الله والعباس سعالاي
    زرگ رمحه ومرگ طيبه عليه

    خذت عگلي يداحس واسره بيها
    لذبهه بنار هجرك واسره بيها
    شبه ست الزبيده واسره بيها
    اغلطت ثاريها ليله العامريه

    جرح گلبي يلاهي شوكت يلتم
    جفو وصفيت مثلك يخي يلتم
    لون نعرف شملنه شلون يلتم
    وحياتي مطمع ولا بالدنيه

    جرحي ما يفيده اخياط والشل
    اخبرك يا حبيبي الدمع وشل
    انه شبيدي اعلى الزعل يالليل وشل
    شال وصبحت داره خليه

    گلبي يلوع ما بطلت ونته
    هلال العيد هل وراح ونته
    يولف اصباي انه بذچرك دوم وانته
    خايب بالوصل تبخل عليه

    الدهر طگني ودعه بگلبي يراحاي
    الدهر بدل دم السابج يراحاي
    الدهر بالچ تامنينه يراحي
    الدهر غدار وافعاله رديه

    اخبرك حيل بيه بعد ماتم
    عليك وبالگلب منصوب ماتم
    شبابي وعز شبابك بعد ماتم
    وخذك مني غفل سهم المنيه

    سيوف الدهر بس وياي يارت
    ومن وني جميع العرب يارت
    عسى امي لا تلدني كون يارت
    اولادة القهر اثرت عليه

    اسألك بحضن الولف منام
    بسبب واشي علي زعل منام
    ربع الليل اليمر عليك منام
    لا والوحش ديارك عليه
    من دمعي رعاة ارتوت ونعاي
    ومن وني انحنه الفولاذ ونعاي
    يظل هذا ونيني عليك ونعاي
    لمن يصفه الوكت وتعود اليه

    القهر والاخ من صغري بدالي
    وانه چم كاس الهنا دهري بدالي
    لون تصير يا عاذل بدالي
    تشوف شلون الام الدنيه

    وحگ اللي انذبح بالطف وريده
    احبه وبي الي رغبه وريده
    اريد اصبر وخله وريده
    اشوف شلون تاليته عليه

    ناحل وامشي مكابر تراني
    تراه الموت يدهاني تراني
    واجلد خاف عدواني تراني
    واگوه من يمر شامت عليه

    بده وطر المنازل ياعلينه
    عثر ونصيح كلحنه ياعلينه
    على اهلك غيض ناچل ياعلينه
    ادركني لا تشمت اعداي بيه

    ردتك ذخر عد راسي وساده
    وردتك سور للعيله وساده
    وبعد لا تامن لمومن وساده
    التشوفه حبل تراه راس حيه

    ربي ليه القهر خصص وناله
    الناس النعم سلوتها وناله
    وكلمن اخذ محبوبه وناله
    وانه نلته وفلت من بين اديه

    بحياتي ما شفت ياناس راحات
    اجيبن هاي كالو ذيج راحات
    الليالي الماحسبت تروح راحات
    اجتني الماردتهه تمر عليه

    الهوى والله يذوب گلوب منصاد
    وعمت عينه حبيبي بيوم منصاد
    چنت صياد ماهر وابد منصاد
    ولچن هسه انصدت غصبن عليه

    هلا بالبيگ كل لسان ينشد
    وبسمك كل حبل مگطوع ينشد
    شگل للگصدني عليك ينشد
    اگله مسافر لو درس تحت الوطيه

    الدنيا شگد هم ودرد فيها
    وسبعه وبس عليه ضاگ فيها
    بناله دار يسكن عود فيها
    ترك داره وسكن تحت الوطيه

    يهالواگف على الازلال لاله
    وخدك من شعاع الشمس لاله
    لزمنه من الخدود وصاح لاله
    بثنيت اهلي وتمد ايدك عليه
    ابه افركچن لما ادميچن يراحاي
    بسبب كل حين تلچمن يراحاي
    الچ ضنه بعد بيهم يراحاي
    لو گطع النزاع وهاي هيه

    اسألك عن عفيش البر بيادار
    احصدوه وبيدروا منه بيادار
    اانشدك عن ثلاث امسن بيادار
    الگمر وسهيل والنجمه السريه

    ملوم الناس حيل اوياي منداي
    انادي ولااظن يفيد منداي
    الك راي بدليلي راي منداي
    عظيم وبالتوالي يعم عليه

    عسه لاطاب عيش الوكت بعداك
    عزيز ولا علي بالهون بعداك
    على الدنيا العفه ياصاح بعداك
    جوار الدارسه وتبيد بيه

    نكت بدعي دموع العين وتهل
    وگظيت العمر بس حسرات وتهل
    عادات البدور تغيب وتهل
    غبت مالك يبدر الما تحيه

    گصن ما زعزعن عزمي ولاذن
    او بيه احتمت نكباتي ولاذن
    اذا ناديت ماتسمع ولاذن
    تبقن لا حياة اعله الوطيه

    هاگلي يصاحب بعد شملاك
    تشتت وانجسم نصين شملاك
    اشبگه عندي اشخله الدهر شملاك
    ابطرگ روحي العزيزه وهاي هيه

    زماني حط الي عله يعله
    ينزل الفوگ والواطي يعله
    اود هسه العمر يگضي يعله
    ولا عيش المذله يدوم اليه


    زماني ملته روحي وملها
    جفاها وگطع رجواها واملها
    المصايب صرت انه ابوها واملها
    بعد ماظن سروري يعود اليه

    اشبصرك بالمصايب طبگ لو جن
    احمدني ولاتلوم العگل لو جن
    اذ الوجن تراني بسبب لوجن
    الكرامه اودارهم ضلت خليه

    تعال وشوف كل اعضاي ماجن
    وانه صبر وعگل ماجن
    اخبرك بالليالي جفن ماجن
    بعد هيهات عودتهن اليه

    روحي الماتذل ابدن وتابه
    اصبحت طوعك بماتامر وتابه
    السماحه بين كفينك وتابه
    اخذ عكلي ودوجها يرشد اليه

    الدهر غادر لعند النذل حبله
    گصه والتف على الطيبين حبله
    الرزيه تعت صار سنين حبله
    معسره ولا اضنهه تجيب هيه

    شبه جيد المها لو راد يلتاف
    جفل وابعد ولا ظنيش يلتاف
    حدي وياه لمن علي يلتاف
    الچفن واتوسد تراب المنيه

    يفز مثل الگطا كلبي منشفاه
    وعلي الچان مشروبي منشفاه
    عسه كلمن گطع شفي منشفاه
    بمرض لا للشفا ولا للمنيه

    قضية اسمك على اسمك ماشخطنة
    ازدحام احنة على دربك وماشي خطنة
    شتضن من كد حلاتك ماشخطنة
    اليشوفك ينشخط مية بالمية

    حبيبي شرد اسولفلك…ولكدر
    والهموم مبن ماعاين…ولكدر
    الي جان وكتي …ولكدر
    وصرت انته والوكت عليه

    نوبه حلوات الليالي نوبه…مرات
    وحبيبة الروح علي ما…مرات
    مو مره الخنتي يحبيبه…مرات
    تخونين وتصح بيه الاذيه

    هذه الابوذية عن صديق غدر بصديقه
    المغدور يقول …
    ولو مايسوى كلمة من اكتبة
    ولكن سالفة ونكتة نكتبة
    شنو حكم الغدر صاحب نكت بيه
    عليه التف غفل لفة الحية

    الجواب من احد الاصدقاء الخيرين ..

    العقل بأمر الصديق ارجوك حكمة
    وبدال النكتة خلي ايكون حكمة
    اليغدر صاحبة مو مهم حكمة
    المهم شلون نتلافة القضية

    صرت كهوه لحبيبي بوسط فنجان
    فن انس الي يوصله فن جان
    اذا العاقل نضرلك نضره فنجن
    وانه المجنون وتكلي انظر اليه

    انة الحزت الصبر والصبر حزني
    والف وسفة اعلة سيف الظلم حزني
    البحر البيض لون يلفيه حزني
    يصير اسود بلون اليل مية

    أزعل يا وطن وارجع اراضيك
    وحن بغربتي لناسك واراضيك
    بغير الفرح صدك ما ارى ضيك
    واذا ًَمََرك حزن احسه بيه

    سماك
    حلو إسمك وأبوك شلون سماك
    حبيبيك لو زعل وياك سماك
    صرت سمچه وانت الصرت سماك
    لو طحت بحنانك إعطف عليه

    احبك من جنت جاهل واناحباي
    مابطل وني عليك ونحباي
    لون ينكضي نحبك ونحباي
    يتلاكه هوانا جوه الوطيه

    جنت انت المرض وانت دوالي
    وصارت بالجدم منك دوالي
    اهديتك گلبي وتگلي دولي
    وصرت دم ودمع تذرف عليه

    جمر دمعي عله خدودي ترى سال
    كطعََّتّّّّ اخبارك حبيب تراسل
    انه انسليت من هجرك ترى سل
    وتون الروح وتريد المنيه

    يمرمرني ويصيحن بيه همال

    وحگ عيسى وحگ مريم والاحد
    بعدهم ما تهل عيني عله احد
    حفر گبري من اخذ روحي ولحد
    وقروا الانجيل من صلوا عليه

    اهداء الى اعز الناس على القلب

    زماني شما لعب بيه…ولهتم
    والراده علي يسري…ولهتم
    بروحي شماتغيرتوا…ولهتم
    لان حبكم دوه لكل مرض بيه

    كلبي من الحزن ورث…وعطاب
    وعيني اعله الطالع…وعطاب
    حنيت لزادك وملحك…وعطاب
    لان بس ملحك الغزر بيه

    جيتك وبظلام الليل …عناي
    وعزفت بروحي مية جرح…عناي
    بعد ما ظنك تنشد…عناي
    بعد هجرك يروح الروح اليه

    مره اشوفكم مشمش…مرتين
    وكلبي مو مره حب…مرتين
    العنده مره هلكانوانه…مرتين
    وحده ترفع والثانيه تكبس بيه

    بنات الوكت يا ناس…مرضني
    يرضي بيهن الكلب…مايرضيني
    مره يقيني يصيب وياهن…مرضني
    ضني بكيدهن ميه بالميه

    فراكك هدني ولا خله بيه ابد حيل
    وياهو اشكيله يكلي يستاهل والف حيل
    كلما تدوس على كلبي اكولن بعد حيل
    دوس وخلي الوجع يزداد بيه

    نساك الطلع برة ونـتـناسة
    يالعراق انت اهله وانت ناسة
    يذكرك تراب الوطن وانت ناسة
    لاتنسة الفرات من شربت ميه


    *********************



    تجميعي
  2. بواسطة إحساس

    عيوني من سبب فرگاك حايات
    مغذيني هواك اسموم حايات
    اموت ولا اطلب من النذل حايات
    علي بيت المرد عيني جويه


    موضوع رائع وذائقه جميله
    سلمت يديك على الطرح
    شكرا لك على هكذا ابداع
    تقديري واحترامي [صورة][صورة]
  3. بواسطة مرتجى العامري

    شكرا جزيلا للمشاركة
    اهلا بك