منتديات نبع الفرات

تمت ارشفة منتديات نبع الفرات

المشاركات من الموضوع (غبشة سنيني) احمد الطفيلي

  1. بواسطة إحساس

    (غبشة سنيني)

    احمد الطفيلي/ النجف الاشرف
    سهر روحي ضوه مسيّر بشفّة ريح
    من تجفل روازينك حچي الگمره
    وانه مناطر بگايه الشوگ يم بيدر
    حسرتي بطاگ محشوم الذنب حدره
    تنين الحنّه يستاهدني
    طوف بزحمة الچفين
    واهو مبين
    نذر كحلة حديثة ليل فصليته فجر مرود
    وتدري الشاخه ما تكشخ بسفة سيل
    من يجبل نهر روجاته گذلة فيّ
    وتدري بروحي تستاحش ضمه
    العيسوب اذا وچدت گطرة ميّ
    وكل هذا
    وانوخ حدر زلفك
    دله عطشانه عله موگد كيف
    ويطاري الماي متّرب ظن المعزبين
    من توحش سمه ارسومك زوايه الصيف
    وما مش (جيد) يندهني واغنيلك
    طرب عشرين..واخذ شكو بنهدك حيف
    يا غبشة اسنيني اشچم حلم اظلم
    يمر بيه ويدايني نظر عميان
    واشيع كل بخت ملچوم
    من طاري توابيتك لحد خدران
    ومسامر هلاهل والنثيث يزود
    ومنادس اچفوف بمرّوز البيبان
    صوغة عرس ترشگ
    وجه چم زافوف ودّع زفته بلچمه
    وسراديب المشابگ فرزنت
    چم شاب يستاهد دفو الظلمه
    ولو ريحك خذاهة شراع
    واغتاظ الهوه بسفنك اهب نسمه
    اعتنيت لصوب المعرسين
    لگيتك حفنة مرايات
    وباهلت النجم حنه ونذر عرسان
    هلبت رشفه منك عطشت ولايات
    يوجه الفجر چم شامه عله شباچك
    تچيم عيني يم طرواك
    چف بساط ما شايل وكاحة طين
    وتدريني اوج خنياب اذا گيشك ضمه
    العاگول والنرجس يناطر هلبت متيهين
    دطش روحي بخضارك ماي
    اشيملك ورد غندور
    وامد جفي عوافي وگنطرة ماشين
    ناغيني سرب نعناع وارسمني
    عله شعرك طوگ شعرك يترس ولايه
    وانه استاهدك جايوس دستاهدني فختايه
    واذا جاسك سمار الليل
    واغتاضت الكمره بيوم
    تلكاني ضوه مرايه
    اطش خلگي (عجد) شمام
    لو غاظتك ديرة ياس
    وادوهن ليلك اليرسي جدايل
    نوخت بيه نجم طايش
    ونداوة عينك تغازل بچي
    النهران من يمرگ جفن طارش
    واتيهن وانگل النيه سنابل
    والوكت منجل يحز بيهة عله المامش
  2. بواسطة بهلول الرشيد

    ري العمر مشوار تكضي أيامه وتعدي
    ولو أدري الوكت دولاب ياخذبينه ويودي
    جا ما شمت الشمات بيه ولا خنت ودي
    ولاخليت دمعي يسيل تيزاب وحرك خدي
    مو انته الكلت أعوفك واخلف بوعدي
    أشو نص الدرب يفلان وتبريت من عندي
    لحيمي ودج عليه الريش وجناحك كوه بجبدي
    كل هذه التعب والطيب ضيعته وصرت ضدي
    صدك ينسى الفكر والضيم من يستغنى لمجدي
    بعد وردة شبابي تفوح ما طاحت بمرض معدي
    بعد حملي عدل ما مال ليش تعوفني لوحدي
    تدريني خشب وبنار بفركاك رماد وابدي
    كل جرح يألم يطيب بس جرحك جرح يضل يدي
    بعد شتريد من عندي شضحيلك بعد شفدي
    ولو أدري النهاية بهاي ما جنت بهواك أبدي