منتديات نبع الفرات

تمت ارشفة منتديات نبع الفرات

المشاركات من الموضوع شعر شعبي الليل مايستر فضيحة بين لثگات الچراچف - نوفل الصافي

  1. بواسطة حسن الياسري

    الليل مايستر فضيحة بين لثگات الچراچف
    ینچفي الباب بفشلته من يسد روحه اعله حسرة
    توذن بضلع العفيفة الضاعت بزلة خبز
    زلة حرب .. زلة رصيف
    ورجلي خلتني اعله شارع
    أنظف المابي عاملني على مدري
    ومن كبر مدري ودريته اشتريته
    واشتريت الليل كله بكل غراضه
    بكل مجاديّة وسدارة شارع السعدون
    واطفال السطوح الفلتت من عيون أشرطة الحبوب المانعة
    وعاشت رخيصة
    بين أحمر وأصفر أخدود الشوارع الخادر الجيش بدمعها
    ليش سودنتوا السمه وسديتوا باب الله الچبیر
    وبگتوا الله الچان حیل صویحبي
    وبيش قنعتوا الجروح الخاثرة بكآس الملامة الثلث ترباعه دمع حوبة صفنتي
    بيش !! ليش ؟؟ شلون !! منين ؟؟
    لوين خارطة ليلي التشخبطهه كحلتي
    الچنت اشوف عیوني بيهه تمسني حيل
    ويروح ليل .. ويجي ليل يخوطني بخاشوگه ميتة
    ويچفي طاسة روحي بحلگ النهار
    وداعة الله يانهار .. وداعة الله .. وداعة الله الشفايف المابيهه لون
    تشتريني زيارة الكاظم .. واتيه اباب دروازة زلم
    انا يالكاظم غريبه بين مابينك جسر خوف .. وحنين وليل غربه
    وشيله غرگانه دمع شوگ ونعاوي
    انا من يومي وسبعتيامي يالكاظم غريبة
    بروحي يتمرجح سجن..منين الولحله عفو
    نغبش بروحي مناره من النحيب
    منين اجيب لروحي طيف
    ضلوعي تتوضى بشمس باچرتجيك منين اجيك
    منين أجيك وآنا أحس بروحي ماي
    وخمس أصابع للشمر غمسن بي
    أشلون أجيك وتوبة العاهر جريدة الناس تقراها بلاش
    يا بلاش البي عشت وحدي غريبه بين حيطان التفاهات ودرازين المواعيد الشريفة
    وطلة القوط النظيفة
    وما يخالف آنا بت المعصية .. وأنتم نظاف
    يا نظاف .. شاردين .. من شبابيچ البيوت البيهه نسوان الشرف
    وآنا بت المعصية .. وانتم نظاف
    انا وي دمعات آخر نشغه مسكوفة بأبو نواس اتاني
    أتاني الباردين
    الكل مسامات الثلج بعيونهم تشرب حنيني
    يشترون اللهفه بالما أدري بيش
    وآنا أبيع المادريته المو ألي .. ماﻻت الله المايفز من تكش روحي
    من تدب أصابعهم على وشالة ونين
    وآه مليانه صور .. صور ذيچ المواعيد وحلمها
    من يجيني اباب مدرستي وانگعله الظفيرة
    بهيلة الچاي اﻻبوگنهه غفل من أمي وأتحمل حچیهه
    ليش .. ليش طشرتوا ضواي
    وحجلة اشواگي ونفانيفي الگصار الچنت اکبرهه علی طولي بلكت توالمني طولك
    ليش طشرتوا ضواي
    وحجلة أشواگي .. وحلم زفة خضار الردت اگله
    ردت اگله آنا بچیت الغبشه بوداعك نده الدنيه وعطشهه
    وگمت أشم بروحي شبگة ماي مختنگه .. ودراويش
    ومواويل اعله دگ أدفوف مبحوحه بدمه احساسي .. وعرس چذاب
    ليلية وجع دنيه وبقايا انسان سلّس كل أصابيع الندم بيده
    وعلى جفوفه كتب مليت يادنيه شبعد بيه
    شبعد بيهم .. شبعد بيهم من اخم جيوبهم الگاها دم
    وچنت اشم قمصانهم تنگط بچي وريحة احديثات
    أشوفن روحي بيهن بأول الخطوات الليل الچذب
    يستر عبايه بين شهگات الچراچف
    يعثر الباب بفشلته من يسد عينه عله حسره توذن بضلع الشريف..
    زلة خبز .. زلة رصيف
    وتوبة العاهر جريدة الناس تقراها بلاش
    يابلاش مو وكتها
    عندي موعد .. وموعد التوبة بعيد
    من رخصتك


    من مهرجان ترانيم الوجدان 2014