منتديات نبع الفرات

تمت ارشفة منتديات نبع الفرات

المشاركات من الموضوع الطريقه الذهبيه لدراسة اللغة العربية

  1. بواسطة حسن الياسري

    الطريقه الذهبيه لدراسة اللغة العربية

    أول شي ناخذ تقسيم الدرجات لكل موضوع

    1 العلمي :-

    القواعد 40 درجه
    الأدب 40 درجه
    ألانشاء 20 درجه

    2 الادبي :-

    القواعد 30 درجه
    الادب 30 درجه
    النقد الادبي 15 درجه
    الانشاء 25 درجه



    هسه نقسم #القواعد شكد يجي على كل موضوع

    الاستفهام - من 7 - 9
    النفي - 8 - 10
    الاستثناء - 6 - 12
    التوكيد - 7 - 9
    التقديم والتأخير - 3 - 5
    المدح والذم - 3
    التعجب - 3 - 5

    شوف / مرات دور يجي ع الاستفهام 7 ومرات 9 ومرات 8 .. يعني مو ثابت .. ولهذا كتبت من وألى .. حتى تعرف ..

    ألـــقـــــواعـــــــــــ ـــــد

    هو عبارة عن اشخاص مجهولون ونحتاج الى أن نعرف شخصية كل شخص شوكت يكون محذوف من الوجود وشوكت يكون نكرة وشوكت يكون معرفه ؟ وشوكت وشوكت وهكذا .. أما طريقة دراسته كالتالي

    1تجزئة الموضوع مثلا أجي للاستفهام اشوف شنو الي بيه ؟ بيه حروف و ادوات و أفعال

    2 أجيب ورقة وقلم وهاي الورقه خل تكون ورقة سجل لأن راح أسوي مخطط بنفسي وأكتب فوك بنصف الورقه حروف الاستفهام وأبدي أنطي عناوين لكل حرف مثلا الهمزة شوكت تحذف ؟ وشوكت بوجودها الاستفهام يكون تصديقي وشوكت يكون تصوري ...

    3 لمعرفة كل شخص احتاج الى معلومات وحتى اعرف الهمزة اكثر احتاج الى اسئلة وزارية قبل لا اروح لغير حرف ..أجيب اسئلة وزارية ع حرف الهمزة وابدي أحل وزاري واترك المتشابه .. وبنفس ورقة المخطط أكتب سؤال شامل يتكون من 5 افرع وهاي الافرع هي اسئلة وزارية واحلهن بنفس ورقة المخطط .. لأن هاي الورقه نفسها راح استفاد منها بيوم الامتحان الوزاري لأن راح تعتبر كمراجعة سريعة الي ومفيده أوك ؟؟؟

    4 وهكذا اكدر الخص الاستفهام كوله بفد 7 او 8 صفحات وبشكل مخطط . والنفي كذالك ..لتنسى أجزء المادة . ادرس كل جزء ع حدا .. وادرس اسئلته الوزارية يالة أنتقل للموضوع ألي بعده ..

    الادب

    طريقة دراسة الادب سهلة جدا لكن اغلبكم يخطأ وهو ان يدخل صلب المادة بسرعه .وأني اكلك الادب مادة درخية فتحتاج #للأعادة .. شوف شلون تدرسها مثلا ناخذ الجواهري كمثال .. هم اجزءه

    اول شي اقراه قراية عادية مجرد أطلاع بدون أي حفظ فد 3 دقائق بس أشوف شنو الي بيه ..
    بعدها أجزء موضوعه هيج
    1) حياته
    2) قصيدته
    3) المناقشه

    خطأ أن ادرس المناقشة قبل القصيدة لأن القصيدة تعتبر مرجع أساسي للمناقشه وخطأ ادرس قصيدته قبل حياته لان ما راح اعرف ع شنو تدل القصيده وبعد ما اخلص كل 3 شعراء أمتحن نفسي بيهم مو شرط اجاوب 100% وانما هي تعتبر كمراجعة سريعه وكأعادة وبالاعادة تتثبت المعلومة ..

    الأنشاء ..

    المتوقع في اللغه العربية .كل سنه نشوف اساتذه ترشح . اما عن الوطن او الصديق او الام .. ويجي الامتحان ونشوف يجيب موضوع عن المهنه او التربية او الكفاح وغيرها .. لذلك بالنسبة للتعبير عن الانشاء . هو أن تعيش الدور وتدخل بأجواء الموضوع افضل من أن تحفظ مواضيع ومتجي . لذلك اذا دخلت بجو الموضوع واندمجت وياه راح تكتب كلمات بحياتك ما جنت متوقعها ... بالنسبه للاضافات بالانشاء من تضيف فضيف فد اية او ايتين وحديث ومقوله مو اكثر حتى تحافظ ع رزانة النص . مو تترس الورقه احاديث وأيات . تره شي بسيط وميحتاج اي تعقيد بالنسبه للمقدمه والخاتمه مو شرط ان تكون مقدمتك 6 اسطر وفصحى للوحه لا .مثلا هاي هسه مثلا عندي انشاء راح اسويلك مقدمه بسيطه وسهله

    سأترك ما في قلبي لينحته قلمي ويعبر ويسجل عما يدور في داخلي في هذه الصفحات عسى أن تخلد لأنها تخرج من القلب .. وتطفوا فوق بحرا من الحب ..

    وهيج شي بسيط سطرين كافي .. أما الخاتمة مثلا هيج شي بسيط

    وخير الكلام ما قل ودل ان ثمــة عبارات كثيره بالامكان الاستدلال بها ع الموضوع المهم لَـگِنْ اعتقد سددت ووفيت..!! .والحمدلله رب العالمين