منتديات نبع الفرات

تمت ارشفة منتديات نبع الفرات

المشاركات من الموضوع فاشل هامل الزبايلة أجمل وصف لشاب العربي

  1. بواسطة امير الحب

    مرحبا جميعاً ...
    بعيداً عن السياسة و الكلام يلي رح يجيب أخرتي
    اليوم رح نحكي في موضوع أو خلينا نسميها "ظاهرة"
    بس رح نحكي بهالظاهرة على طريقة القصة , و قصتنا رح يكون اسمها
    ( على مين قاعد بتضحك )
    بطل قصتنا شاب اسمو الثلاثي ( فاشل هامل الزبايلة )
    فاشل شاب عربي عايش حياتو متل باقي هالشباب , عندو أصحابو يلي بالأغلب هم متلو.

    و في أحد الايام كان فاشل واقف مع أصحابو في أحد الشوارع , مرت بنت و الادب مبين عليها بوضوح لانو البنت المؤدبة بتنعرف من مشيتها
    بنت عمرو ما شافها او حكى معها بس الفاشل حب يعرط على أصحابو شوي و يستعرض عضلاتو أمامهم
    قال لأصحابو
    * يا إخوان هاي البنت بعرفها , كانت صاحبتي بالزمنات بس حلقتلها على الناشف
    ردو عليه أصحابو
    # ولك ليش ؟؟؟ ولك هاي شقفة , في حدا بطقع لهيك شقفة ؟؟؟
    رد عليهم فاشل
    *انا حلقتلها لانها طلعت جمعية
    و بدأ فاشل الزبايلة في وصف البنت بأفظع الأوصاف و تكلم عنها بكلمات أوسخ من مراحيض المدارس الحكومية ... و بالاخر قال لأصحابو
    * خلص يا شباب ما بدي أحكي عن البنت ,, يا عمي ما بحب اجيب سيرة حدا بالعاطل , هاي أعراض ناس و الله يستر على ولايانا ,, انا ما بحب أحكي عن حدا

    بصراحة فاشل بعد كل يلي حكاه بدو يحاول يقنعني انو عندو أخلاق
    انا و في نظري شايف انو ازا عندك كل هالاخلاق يا فاشل بتسد بوزك و بتخرس و ما في داعي تجيب في سيرة بنات الناس من اولها
    و ازا ما عندك اخلاق بتحكي عن البنت بدون ما تسوق علينا الشرف في الاخر .
    لانو احنا مش أولاد صغار تفكر حالك عم تضحك علينا
    يا حيلة امك يا نهفة أهلك

    و في موقف تاني من مواقف فاشل الزبايلة كان بيلعب مع أصحابو شدة و خسر الدق
    و بدأ يسب في الله
    من طباع فاشل سب الرب و الدين و الملائكة و الانبياء إلخ في مناسبة و بدون مناسبة
    بيكفر و هو بيلعب فوطبول , بيلعب شدة , في الشارع , في البيت , ازا بكون معصب , او رايق و بيحكي نكت
    و اللافت للنظر انو فاشل يتفنن في إبتكار الكفرانيات و بيصير يحاول يبتكر في كفرانيات غريبة عن مسامع أصحابو
    في جميع الاحوال ذكر الله على لسانو بس بالكفر
    و أخر شيء بيختم بكلمة
    * بس يا شباب لا تخلوني اكفرلكم على ساعة هالمسا
    او بكلمة
    * استغفر الله العظيم

    يا فاشل يا ابن الهامل
    اول نقطة كل هاد و لسا بتحكي لأصحابك
    * ما تخلوني أكفر
    ليش كل يلي حكيتو شو ؟؟؟؟؟
    تاني نقطة , انا مؤمن بالله انه غفور رحيم
    و بعرف هالشي و متأكد منو .. و متأكد انو الله مش ولد صغير تضحك عليه
    لانو رح ترجع تعيدها كتير , تسب في الله و اخر شي تقول
    * استغفر الله العظيم

    و غير قصص كتير لفاشل هامل الزبايلة رح نحكي عنها بالمستقبل
    بس عندي سؤال
    كم فاشل الزبايلة بالوطن العربي ؟؟؟
    و بتمنى من كل واحد قرأ المقال لو كان جواتو فاشل زبايلة صغير ما يكابر
    بالعكس , يعترف بفشلو بينو و بين حالو على الاقل
    و يحاول يتغير من جوا

    اقتل فاشل يلي جواتك قبل ما فاشل يقتلك .

    # بقلم : طارق الشعر
  2. بواسطة tHe ShArKe

    الملايين والملايين يا اخي من هالنوع موجودين بالعالم العربي