منتديات نبع الفرات

تمت ارشفة منتديات نبع الفرات

المشاركات من الموضوع ياعراق الخير

  1. بواسطة الشاعر ابو لقاء البهادلي

    ياعراق الخير
    ـــــــــــــــــ

    ياعراق الخير يابو التضحيات * يابيرغ كرامه وبالشرف محفوف

    يااول حضاره الخلُفت احرار * انت حطيت النقط فوك الحروف

    ارضك طاهره جي بيك سبع اطهار * وعطرك من عطرهم للبشر مألوف

    عند اخوتك ياوطن ذبحك حلال * وانت جنت الهم باصعب ظروف

    هداياهم الك متغلفه ابارود * وببساط الاخوه كل غدر ملفوف

    وردت خيبر وصفين والاحزاب * واجت كلهه جهالتهم تدك ادفوف

    من كل صوب طبكت خيل ابو سفيان * وظلاله محزمه متنوعه واصنوف

    وخفافيش الظلام اجمعت وتحوم * تحشم عالنسه ربه وتلم اصفوف

    واصحاب الرذيله ملثمه بالدم * ظنهم ترتعب وتخوفك الاسيوف

    اشكد اشموع طفو والشجر فجروه * وبحزام الحقد اجمل ورد منسوف

    ماظلت بعد اسرار حتى انضُم * كلشي واضح وكلشي صُبح مكشوف

    يردونك تطيح ولو تطخ الراس * وبحبال الحزن ظنهم تظل مجتوف

    نشفت الدموع بكل صبر وايثار * وخيطت الجروح بصبرك انت اتروف

    يالطبعك جبل مادنجت فديوم * جي بيك الصميده المالفاه الخوف

    واخذت من الحسن هذا الكرم والجود * وابو محمد عظيم وبالكرم موصوف

    ماترضه المذله وترفضه للعار * لأن طبعك حسيني وهالطبع معروف

    دروس العزه ماخذهه من ابو السجاد * واكبر عبره عندك ياوطن الاطفوف

    واذكرك بالكفيل وغيرته والبأس * بعيونه السهم بالغيره جان يشوف

    ينضح بالعزم عباس غيره ايفور * يجندل بالزلم تدري بلايه جفوف

    وكل حيله انهدم ياموطني من شاف * باسهام العده جوده بغدر مزروف

    وجودك ياوطن للحين ينضح ماي * لان عباس ضحه وصار دمه اجروف

    وضحه عيونه لجلك ياوطن عباس * ويردونك ضرير وللابد مكفوف

    اسمك ياوطن معناته اسم حسين * ولجل حسين كلبك ياوطن ملهوف

    وبوعي العقول اوحدة اهل الدين * باذن الله الحزن ياموطني مصروف

    واذا ماصارت القسمه ونحج بيوم * كعبتنه الحُسين ويمه احنه نطوف

    وتظل موقوفه الك ياموطني الارواح * وتظل انت وقف لابن الحسن موقوف
  2. بواسطة احمد ابو سجاد

    عاشت ايدك حب دائما مبدع بمواضيعك الراقيه
  3. بواسطة الشاعر ابو لقاء البهادلي

    اشكرك اخي ابو سجاد على كلماتك العطره

    ومرورك الطيب بارك الله بك
  4. بواسطة مـيـــلاد

    شكرا اخي بالتوفيق ان شاء الله
  5. بواسطة الشاعر ابو لقاء البهادلي

    شكرا ياميلاد على جمال المرور