منتديات نبع الفرات

تمت ارشفة منتديات نبع الفرات

المشاركات من الموضوع لا تكتب قصيدة وتنتقد مسؤول

  1. بواسطة بهلول الرشيد

    لا تكتب قصيدة وتنتقد مسؤول


    القصايد للمدح مو للشتم تكتب

    وإذا اتعرفه حرامي كول أنظف إيد
    وهم شايف سياسي ايسلب وينهب
    وإذا يبني قصر من دمعة المحتاج
    الفقره اتبرعتله وعالدمع يركب
    وأبد لتظن يحرمك كهرباء ابيوم
    من حرصه علينه ايخاف نتكهرب
    وجريمه الحصه ينطي وبالرجل تنداس
    وحرام اتخيس عدنه وبالزبل تنذب
    ( حيدر ) مو سياسي وباك حب الناس
    ولأن باك الكلوب اتشرعت ينسب
    ولأن ربك حجبها الدعوة المظلوم
    جار الظالم باحكامه واستجلب
    السياسي ابكد صلاته يحفظ القاصات
    خوب الخيره تحجي سبحة الكهرب
    أنهجم بيت السياسة الهدمت
    وقسمت للبشر قوميه وبمذهب
    وهجم بيت السياسي اليصعد اعله الروس
    وتناوش الكرسي وبالبشر يلعب
    فرحنه الصنم طاح وما ترد أصنام
    وكلنه الراح راح وخيرنه أتكرب
    لتلوم السياسي أشبيده هم ايصير
    مصباح ويفركه أيحقق المطلب


    وشيصير السياسي أبكل حلك مسئول
    يشبع للفقير أبجيبه المخرب
    خطيه ابطرك راتب ما يسد يومين
    وعليه شرهة بشر شيوكل اشيشرب
    أمدلل هالشعب ما ننكر المعروف
    وحكومتنه حريصه وأدت المطلب
    أشحلاته البرلمان النال حب الناس
    لعيونه دعابل مرصع وطنب
    حرموها النفسهم والشعب سلطان
    يزقونه الزلال وتمر المرطب
    شيريد الشعب أكثر بعد شيريد
    كلشي استوردوله وما بعد يتعب
    ركي والحلاوه وموطا بالفستق
    رمان وعنب وخيار والأطيب
    مضايف للفلح فتّح لجل ترتاح
    شتفيد الزراعه ونخل يتكرب
    وشنو نفع الصناعه معمل وجاكوج
    يوفر البضاعه امسلفن امرتب
    يسرط للنفط يستورد البنزين
    من أفضل وقود امسرطن امنضب
    خلف الله عليهم جونه بالتدريج
    نزلونه الجهنم ما بعد تصعب
    مسئولين بينه ويبري ذمتهم
    غداً نمشي ابجهنم عارف امجرب
    وحرام اتريد منه ايبوك بيت المال
    يعمر حزبه بيها وكلمن اتحزب
    صلاته التمنعه والسبحه واللحيه
    وباجر للحساب اشيعتذر للرب
    ربهم ماهو ربنه والسماحه البيه
    ربهم حيل قاسي ابسطوته امجرب
    غربي مره ربهم مره مدري امنين
    عكارب والمثل لا تامن العكرب
    لا ( إسناد) ينفع باجر و(صحوات)
    قرينه الممحي زين ودرسه يستوعب
    المؤمن من جحر ما يلدغ مرتين
    سفينتكم خراب وما بعد نركب
    سواد اوجوهكم بيّض اوجوه هواي
    غسلتوا للزنيم العار والأجرب
    ما نكدر نقارن بالأمس واليوم
    اشحفر ساسه الشعب بيديكم اتخرب
    كراسيهم خشب وأمريكه أرضتها
    طيحت جم عرش بيه حاكمه جلب
    يتهدم الكرسي المنبني ابلا ساس
    ودمعات اليتامه امن الجمر ألهب
    يرتج العرش من دمعة الأيتام
    وعلى ادموع اليتامى الكون ما يحجب


    حيدر ما ملك كرسي الخشب هيهات
    كلب فوك الكلوب وعرشه يتنصب
    يا ربي الستر طاحت كصص للكاع
    ومد ايد الرذيله الجائر وأذنب
    يستر عالحرامي ايهادن القاتل
    السيوف ايحدها بينه وللخصم أرنب
    تعلمنه الكفخ من كثرة الجويات
    دامنه المذله وبيه نتلقب
    تتخورس زلمنه الكثرة الطكات
    لامومن حجه ولا ثاير اتوثب
    ولا صاحب بخت ويصيح بينه الله
    ولا تصحى الضماير لا كلب يشغب
    دخيلك يا علي ما تحضر الشدات
    ياهو الينتخي ويا كرسي يتعتب
    مقفول الفرج وانسدت البيبان
    طحنه ابغيرتك ما غيرك امنتب
    دخيلك يا علي (إلمن بعد مذخور
    معسره وطحنه بيها والطفل شيّب
  2. بواسطة عقيل ابو محمد

    احسنت النشر
  3. بواسطة تقوى ألقلوب

    صح لسانك وبارك الله بك
  4. بواسطة Ali Al-misana

    رؤعه
    دمت بهذا العطاء
    بهلولنا العزيز