منتديات نبع الفرات

تمت ارشفة منتديات نبع الفرات

المشاركات من الموضوع قصيدة مذبوحة الاحلام** بعيوني كبل عيونه للشاعر حيدر تركي الكربلائي

  1. بواسطة محبوب القلوب

    ]مذبوحه الاحلام ** بعيوني گبل اعيونه
    مذبوحه الاحلام ** بعمـر الورد تدرونه
    جاسم إبني عرسه بالحومه
    جاسم إبني حِنّتـه ادمـومه
    ----------------------------
    مَدري واقع لو حلم .. جاي اعيشه ابكربله محتاره آني
    والله تعّبني الزمن .. ادري ظـالم بعد ما يرحم زماني
    ساعه اتوقع حلم .. وعيني تنظر حِنـّه وشموع وصواني
    وساعه اعيش الواقعه .. وللوداع اوليدي جسّام اعتناني

    مذبوحه الاحلام ** ياوسفه فوگ اجفوني
    مذبوحه الاحلام ** من شوفته ايحرموني
    يومـي ياريته گـبل يومه
    جاسم إبني حِنّته ادمومه
    ----------------------------
    آنه رمله امّ الولد .. صايِمه كل عمري وانطر عيدي
    يوم يوم احسب إله .. حته عرّيس آنه اشوف اوليدي
    ومن وصلنه الكربله .. لن يريد ابني يروح امن ايدي
    آنه عاتبْت الدهر .. گـالّي يارملـه دمـعـچ زيدي

    مذبوحه الاحلام ** لا ما حسبْت احسابي
    مذبوحه الاحلام ** يِجفوني اغلى احبابي
    وسفه أبقه منّه محرومه
    جاسم إبني حِنّته ادمومه
    ----------------------------
    توّه كابوسي ابتده .. وصـاح يَــمّ جسّام لابنچ نوحي
    ومن سمَعْت آنه الخبر .. والله احس هدّم جميع اصروحي
    اوليدي لو عنّي ابتعد .. تبتعد عن جسمي يمكن روحي
    ابسهم هَجره امن انرمي .. من يداوي علّتي واجروحي

    مذبوحه الاحلام ** بعـيوني مـا خلّوها
    مذبوحه الاحلام ** منّي غصب أخذوها
    الدمعه ابخدّي هايه مرسومه
    جاسـم إبنــي حِـنّته ادمـومه
    ----------------------------
    عمره چن عمر الورد .. بساع يذبل لـمّن ايگِطعونه 
    والله اخاف امن الحرب .. خاف مثل الأكبر ايصَوبونه
    ما بلغ حته الحلم .. بعده ما شاف العرس بعيونه
    لا تحِرموني صحت .. عمري ما أتحمّله من دونه

    مذبوحه الاحلام ** ابطـف كربله للتالي
    مذبوحه الاحلام ** منّ ايدي راح الغالي
    ولجله والله آني مالومه
    جاسم إبني حِنّته ادمومه
    ----------------------------
    يوم يوم اتنطّره .. واحسـب ايّامه واعـدّ ايّامي
    يمته يكبر ضنوتي .. ثاري آنه العايشه بوهامي
    الموت لابني منتظر .. ياوسافه اتبددت أحلامي
    صار مكتوب القدَر .. اتشوفه عيني اعله الترايب دامي

    مذبوحه الاحلام ** شمعاته من طفّوها
    مذبوحه الاحلام ** چفّيـنه دم حنــّوها
    ليش ابسيف الجبهه مهشومه
    جاسم إبني حِنّته ادمومه
    ----------------------------
    چنْت اناطر زفّته .. عيني هم عرّيس يوم اتشوفه
    آنه واعدْت الحسن .. بيدي اخلّي حِنّته بچفوفه
    وجابه ابو اليمه إلي .. امن الطعن جثّته ما معروفه
    گلْت اضمّد عِلّته .. اتحيّرِت ياجرح إيدي اتروفه

    مذبوحه الاحلام ** العرّيس راح امن ايدي
    مذبوحه الاحلام ** منّ ايدي راح اوليدي
    ليش آمالي ابعرسه مهدومه
    جاسم إبني حِنّته ادمومه
    ----------------------------
    تمّت والحمد لله في ..../ ..... / 2014
    خام الحسين حيدر تركي الكربلائي
  2. بواسطة ام بنين

    في ميزان حسناتك ان شاء الله تعالى
  3. بواسطة محبوب القلوب

    شكرا لك عزيزتي على مرورك بكلماتك الممزوجه بالماء الملكي