منتديات نبع الفرات

تمت ارشفة منتديات نبع الفرات

المشاركات من الموضوع الى من يهمه الامر

  1. بواسطة رعد ابو وسام العكيلي

    ...............رساله بقلمي ليست لشخص معين...............
    .....................هي الى من يهمه الأمر....................
    مو كلشي نگوله يكون مقصود*تره بعض الحچي ينفهم بعدين
    نوبات النذكره شخص موجود*ونوبات القصد يم البعيدين
    ومرات القلم يشطح يروح بعيد*ومرات يتنومس بالعزيزين
    ومرات العقل ينشغل بلزينات*ومرات الفكر مشدوه بالشين
    ومرات انسئل واحتار بالرد*ومرات الجواب يجيني بلحين
    وبعض الناس حارت بيهم عقول*مانعرف قصدهم زين؟موزين؟
    إلسانه عسل من يحچي وياك*وبس تجفي يحط بالظهر سچين
    متدخل بامرك وانته ماناخيه*يحط روحه كتاب وهوه حرفين
    تكفر من تنصحه عمي إبعد غاد*مابين الاهل ماكو سلاطين
    عكس السير يمشي ويسعى بالسوء*ويدخل بالخراب ويشب نارين
    يذم هذا يگوم ويستهين بذاك*وبس هوه الفهيم اليندل الصوبين
    ندري الذيل يوصل گوه للراس*واكيد الذيل ابد مايسوه فلسين
    لباسة عگل من چان زعطوط*مايعرف الخمره من الجلاتين
    كله عله بعضه قاط مطلوب*وخاچيه عتيكه وشطفه بالدين
    مايصبح فريضه بكلمه لو تصوير*من اصل المشاكل بيه ثلثين
    عله سبعين محمل حاملينه عود*ياوسفه طلع يلعب بحبلين
    احنه الحاجب ويعرف شجواه*وماتعله ابد عالحاجب العين
    شماله حاط روحه فاله للمجنون*هوه شدخله بين العيالين
    اذا هسه يكضنه الخجل من الناس*ونسولف بطيب ونحچي بلين
    باچر لا..وحگ الزهره والكرار*مبخوته الزلم تتحزم حزامين
    ننشر بالاسامي ونكشف المستور*ونوضح الحقيقه ونكتب بقلمين
    نسقطه وبلبخت بعيون كل الناس*ويعرفنه بنشرنه نروح ليوين
    وتره نعرف نحط الطينه بالخد* ونقصف بالاشعار ونحرگ البين
    ونسولف ضحالة عقله المذموم* واتفضحه المضايف والدواوين
    شني وصف النفاق البين الاخوان*شنسمي اليهوس بين الاثنين
    شنو اصله اللي ينگز يم سلف ذاك* ويم هذا يتختل بالبطاطين
    ويم ذاكه حمامه يصير مذبوح* ويم هذا صگر بين العناوين
    مو احنه التناطح شوفلك غمان* وتناطح وياهم سنه و سنتين
    تاريخ وعرفناه من الاجداد* مو هوه اليبدله انكتب من قرنين
    نتسامح نعم ونقابل بطيب* بس اللي يسامح مره مو مرتين
    لا يدخل البيت من الشبابيچ* يدگ الباب اهلا يگعد إبيتين
    بسه يعتقد يگدر يفرق الناس* متروسه المضايف خير بالطيبين
    اسرار البيوت وبيهه ماينگال*«گرايب هالسلف گلوله انته منين؟
    لايگطع الشجره بفاس مثلوم* شجرتنا عظيمه وصخر مو فلين
    متوهم .....خياله رايح بعيد* نخاف عليه من صفگات الايدين
    خافن وحده منهن تخطي الصواب*وبصخام الوجه ترجع الرجلين
    انصحه شيل إيدك لايبو فلان* روح العب بعيد وسوي تمرين
    ومايحتاج اگله فاض بيك الكيل* من نزعل تره نهدم الحياطين
    لقينا الحجه هسه وبعد ماكو اعذار*كافي انواط چذابه ونياشين
    مغتاضين حيل وعيب ع الاجواد* تبج بالگهوه وتكسر الفناجين
    يكفيه التطفل ينعل الشيطان* مو شيطان واحد..لا..شياطين
    ويتذكر كلامي ويحسب حساب* تره المكروه مو مثل الرياحين
  2. بواسطة شـ,ـهـ,ـد

    احسنت
    كلمات خطت بكل ابداع ورقي
    سلمت اناملك