منتديات نبع الفرات

تمت ارشفة منتديات نبع الفرات

المشاركات من الموضوع مدونتي بنكهة الجنوب وطعم الناصرية...

  1. بواسطة ضياء الصافي

    [صورة]
    هنا سأضع مابين أيديكم ما جال بهِ صدري
    ونطق به قلمي, هنا سنستذوق معكم نكهة الجنوب
    بعذوبةِ الحسجة وبساطة الكلمة
    فنتمنى ان تروق لكم تلك الاحرف البسيطة


    هنا انا معكم

    سيد ضياء الصافي
    4/1/1982

    الساعة
    4:30 يوم الاربعاء 2015
  2. بواسطة ضياء الصافي

    سيد وتاني الناس موفضل مني
    واجب واحس مرتاح لو ضحك سني
    بقلمي
  3. بواسطة ضياء الصافي

    بالنار أطفي النار حسبالي بالماي
    هجي انا حالي عليك معميه عيناي
    بقلمي
  4. بواسطة ضياء الصافي

    بالنار أطفي النار حسبالي بالماي
    هجي انا حالي عليك معميه عيناي
  5. بواسطة فهد الزيادي

    بالتوفيق مولاي من المتابعين:)

    تقبل تحياتي(:
  6. بواسطة ام بنين

    مبارك لك الافتتاح

    متابعة ان شاء الله
  7. بواسطة ضياء الصافي

    ابقى يتيم مناطر الباب بخلك
    مايوم ابطّل وابقى ليك متاني
    ادري الدهر وسيوف طعناة اليضدّ
    خلن اثر بالضهر بس ماعاني


    لك ياسيدي
  8. بواسطة ضياء الصافي

    حياكم الله
    وإن شاء الله ستستمتعون بقلمي
    وانا استمتع باقلامكم
    شاركوني
  9. بواسطة ضياء الصافي

    اتقبل تحياتك
    وانا اممنون
    حياكم الله
  10. بواسطة ضياء الصافي

    ركّت عين كلبي ولانفعهَ النوح
    صار أسنين تبجي بغير مكطوعه
    ها ياعين جفّ مايج بعد هي نوب
    لو صارت عليج الدمعه ممنوعه
    أبجي دموم, سهله وداعتج يراد
    نبجي العمر كله وبالكلب لوعه

    لك ياسيدي
  11. بواسطة ضياء الصافي

    غفت ها ما غفت عيني ... من الهام
    صحت يوم الشفت ركو .... من الهم
    عجيبه من طحت نيشن .... من الهام
    لحدّ الجدم حط اسهام بيه
    .....................................
  12. بواسطة ضياء الصافي

    من خوتچ بنيان شيدت روحي
    قلمچ ذهب ونهار طيبه على سوحي
  13. بواسطة ضياء الصافي

    رشكة مطر وتهون سهلة وبسيطه
    انا على جرح الروح يرسم خريطه
  14. بواسطة اسد الهاشمي

    افتتاح موفق سيدنا ... التألق المستمر ان شاء الله...
  15. بواسطة مرتجى العامري

    افتتاح مبارك
    سوف اكون لك من المتتبعين
  16. بواسطة Ibn Babil

    أفتتاح موفق
    سأكون متابعاً ومشاركاً في هذه المشاعر الجياشة لتالق شاعر كبير
    تحياتي ولي عودات
    :1 (51):
  17. بواسطة ضياء الصافي

    سوف تشتاق مدونتي لبوح قلمك
    محبتي


    وانا سوف اكون من المنتظرين لك
    حبي لإتعطر بعطِ وجودك


    لك تحيتي وشوقي لمرورك المستمر
    حبيبي الغالي
    ودي
  18. بواسطة ضياء الصافي

    ما أنسه طيب الزين حد فيضة الروح
    وافرشله روحي ورود ,لو أبقى مجروح

    قلمي
  19. بواسطة ضياء الصافي

    خليها نارك بيك واسمعني انه
    كلبي اليشوفه يكول يجوي بمجانه

    قلمي

    3869
  20. بواسطة ضياء الصافي

    ازرع وخلي الروح تسكيلك الماي
    بس انته خلي العين تنظر لعيناي
    بقلمي
  21. بواسطة ضياء الصافي

    يامن الكعبه تصيح بسمك يكرار
    انت الشرف والزود يابرزخ النار
    بقلمي

    3870
  22. بواسطة Alforati

    عاشت ايديكم
    بس عبارة مدونة هاي جديدة
    المدونات هنااااك مو هنااا
  23. بواسطة ضياء الصافي

    حبيبي الغالي
    ما افتهمت يعني
  24. بواسطة Alforati

    هذا موضوع مو مدونة يعني مجرد عنوان ولاتهتم
    بس مواضيعكم حلوة وشي جديد عالمنتدى
  25. بواسطة ضياء الصافي

    يعني احنه منورين.ههه
    تسلم استاذ
    يمكن أنا فهمتك غلط
    أعذرني انتابني شعور الطفگه.هههه
    هسه الموضوع مستمر غير
  26. بواسطة شـ,ـهـ,ـد

    الله الله ما اجمل هذا ااطعم والون من وسط اهلنا
    سأكون من المتابعين
  27. بواسطة ضحى المؤمن

    ما أطيب نكهة أهلنا وما أروعها
    حينما تنساب على الورق
    أمنية نغرق معها وهي المُنقذ والخلاص
    ...................................
    الضياء سعيدة جدااا
    لأنك هنا معنا تكتب وتغرد حروفك
    على منأى من مسافة تكاد تكون قريبة جداا
    من مسامات حروفنا المتشبعة بالغربة
  28. بواسطة ضياء الصافي

    وما خطري وما حروفي وما قلمي
    تجاه أقلامكم المفعمه بالامل
    آهٍ من حروف الغربة
    تحيتي لضحى النور
    ودي
  29. بواسطة ضياء الصافي

    هله وميت هله ياشاعرتنا
    من سروري ان تتابعين ما اكتب
    واتمنى ان يضع قلمك لمسته هنا
    ودي
  30. بواسطة ضياء الصافي

    ادري انته ما مجبور تعشك بالوهام
    لاتعثر بممشاك باوع لكدام
  31. بواسطة ضياء الصافي

    لاتحد بالله عليك واكتبله بالدم
    لابد يجيك الشوك وعليه تندم
  32. بواسطة ضياء الصافي

    حبك سكن بالعين يعني انته عيني
    تطفر طفر مجنون لمن تجيني
  33. بواسطة ضياء الصافي

    ياعيد اعييد بيه لو انته غايب
    بعيوني احط تيزاب لجل الحبايب
  34. بواسطة ضياء الصافي

    سمچه وخذاني الروج ذباني بالراگ
    هچي انا حالي عليك ما أحمل فراگ


    مقصوده
  35. بواسطة ضياء الصافي

    إجانه العيد؟؟؟؟
    يمكن خاف تييه صيحه گله بداعتك شتريد
    گله أيتام عدنه متانيه الجناز
    يرجع وي رجعته النوح بيها يزيد
    گله الثوب راگد خاف مامعلوم
    رگد من گد دمعنه وماكو كل تجديد
    گله ايشوف غيري ولايمر بالدار
    خل يخطف علينه كون من بعيد
    مابيه فرح مجبور احطً آلام
    گوه وداعتك هچي أنا حضي يريد
    ياعيد اليمرني النايحه بكل بيت
    نسيناها المعايد تاهت من الايد
    راحت عود ترجع هذا يمكن طيف
    بس مجبور اكلكم عود باچر عيد

    بقلمي
  36. بواسطة ضياء الصافي

    ليلي بفكد طاريكم وسن بيه
    وصغت قانون بمحبتك وسن بيه
    لإن ثغرك عسل ينكط وسن بيه
    ليِلو ومن اشوفه انسه المنيه
  37. بواسطة ضياء الصافي

    رد سيفه بلدلّال وبنه خلاه
    ماكفه هذا الضيم رد بيه سلّاه
  38. بواسطة ضياء الصافي

    حط سيفه بلدلّال وانه ال احد بيه
    خاف الكلب يهواه مره ويرد ليه
  39. بواسطة ضياء الصافي

    حديته سيفك زين عف كلبك وتاب
    زنجر بكلبي السيف ويحن للاحباب
  40. بواسطة ضياء الصافي

    زنجر بكلبك سيف كلش بسيطه
    بكلبي اليضيع سيوف يلكه الخريطه
  41. بواسطة ضياء الصافي

    عمي انته كلش زين احنه المساكين
    سيوف وتحش بالروح مجرى الشرايين
  42. بواسطة ضياء الصافي

    كلبي فز غركان هَم ..
    حيل مهتم حيييييل كلش حيل مهتم
    أسم الله كلبي شبيك تركض بالحلم بس كون حلمك يجري دم
    لان يبطل انا سامع بالحلم لوشفت دم
    وسفه بسك لاتهم وامسح بساتين الالم
    اي بساتين انا شايف ورد بس ورد الندم
    ها يكلبي بروح ابوك لاتسولفلي حلم
    مو حلم شفت الحقيقة .. نار شبت بالجسم
    ايييي يكلبي
    اركد وكافي ونينك اسكت يطبك الم
    ها ابشرك لانشد عنك كريم ولا شهم

    صاح كلبي بصوت المسودن هلي
    مره يضحك مره يبجي مره يلعب ذيج لعبتنه القديمة
    (حجنجلي بجنجلي صعدت فوق الجبلي)
    شصعدك من كبر طمك هاي تاليت القمم
    هااااااااااي تاليت القمم



    هنا سيد ضياء
  43. بواسطة ضياء الصافي

    كيف أكتُب ... يمكن ابݘي
    كيف أنطُق... يمكن ألساني انعجد
    راح أحشمك وانته للشده سند
    راح أكلك انته شمعة انته دمعه انته رقمك صعب للگاعد يعد
    انته بيرغ يبقى شامخ يبقى مرفوع بعمَد
    بيك أحزمك بيك أحشمك بيك احط للكلفه سد
    انته ورده البيد عاشگ من يشمهَ الروح تخمد
    انته عالعدوان غاره وناب أسد
    ها يداعش صار بعيونݘ رمد
    فركي عينݘ شوفي ياهو العاف واطيهَ وصعد
    أنا جندي من العراق الماغفه على أخته العفيفه وماركد
    هينه كلش لاتصدك انا اعوفك مستبد
    راح اجيك بغيره تكتل جدحة عيوني برد
    غيرة العباس عندي ومستعد
    وعندي امي الهلهلتلي شتضن ياداعش ارد
    صاحت بيوم التحاقي
    (عفيه ابني الماهبط راسي)
    وانت تدري بهوسة امي الكاع كلها الهَ تشد
    انا جندي وصاح جدي , جدي اريدك للعراق انته السند



    وعذراً لكم ياحماة العراق

    بقلمي
    هنا سيد ضياء
  44. بواسطة ضياء الصافي

    تستاهل انته الروح جيف انته تانيت
    مسمار الك بالروح هذا انا دكيت
  45. بواسطة ضياء الصافي

    تستاهل انته العين يابعد روحي
    من رحت عني بعيد زيدت نوحي
  46. بواسطة ضياء الصافي

    مسكين اضل بجال شماتي انا
    وما كلت عنك باع ولفه وزمانه
  47. بواسطة ضياء الصافي

    موسط عيني ايصير متوسط الروح
    اصرخ واصيح احا غير انا مجروح
  48. بواسطة ضياء الصافي

    شاركت بالكلمات احلى المعاني
    شاركنا حيل وحيل يالله انا تاني
  49. بواسطة ضياء الصافي

    شفتك يغالي اليوم وعيوني تربي
    افرح ولك يفلان صاحاني گلبي
  50. بواسطة ضياء الصافي

    أسهر وخلي العين ماتغفى ليله
    موهينه والعباس صارت طويله
    غيبتك زرعت نار بظلوعي وجت
    اثّرت بيه هواي واعضائي شلت
  51. بواسطة ضياء الصافي

    يكتل افراك الزين يذبحني كل يوم
    مثل الطفل ضليت من امه مفطوم
  52. بواسطة ضياء الصافي

    أهلاً وسهلاً بيچ ياجنة الروح
    ننتظر منچ زود خل قلمچ يبوح
  53. بواسطة ضياء الصافي

    محد نشدني اليوم عن حالي كلش
    وين الشعر مضموم خاطر ابلش
  54. بواسطة Rain

    رائعه جدا سلمت يداك اخي العزيز على هذا الابداع
    متابعين لك:)
  55. بواسطة ضياء الصافي

    زين انته من جافاك عقلك تخبل
    انا الكلب بجفاه سواني طنطل
  56. بواسطة ضياء الصافي

    الابداع هو مروركم
    انا ممتن لمتابعتكم لي ولقلمي
    تحيتي
  57. بواسطة ضياء الصافي

    5486
    انا وي الدمع متخاوي من اسنين
    دمعه اتجيبني ودمعه التوديني
    غشيم وداعتك ماادري بالشيطان
    يتغازل جذب يضحك على اسنيني

    بقلمي
    سيد ضياء
  58. بواسطة ضياء الصافي

    بيه نار لو اشبها احرك بلد
    وانت غافي بريع وادم
    هذا مات وذاك من ضيمك شرد

    بقلمي
  59. بواسطة ضحى المؤمن

    مدونة بنكهة الضياء
    ما أبهاها وما أروع سطورها
    دمت حرفا أنيقا
  60. بواسطة ضياء الصافي

    أيتها الضحى ما أروعك
    لمقدمكِ الروح انتعشت
    ودي لك....:46:
  61. بواسطة ضوة الگمرة

    شوصفك ؟

    وانت ماتنعاب ..
    ياومضة وكتبها مظفر النواب..

    :48: