منتديات نبع الفرات

تمت ارشفة منتديات نبع الفرات

المشاركات من الموضوع قصيدة رائعة القاها طالب في حفل تخرج

  1. بواسطة المراسل

    قصيدة رائعة القاها طالب في حفل تخرج


    هذه قصيدة رائعة القاها طالب في حفل تخرج في احدى الجامعات العراقية في السبعينيات وهي تحكي قصة حب عنيفة بينه وبين طالبة معه في الكلية شك بانها على علاقة مع الاستاذ

    زغيرة وما تعرف تحب



    زغيره وما تعرف تحـــب .. ولا دغـدغ قلبها الشــــوق
    خفيفة بشط هواها تروح .. ودومها تعاتت اويه الموج
    زغـــــــيره وحســـــرتي اجبـــيره ..
    يا صاحبي ما أظنها تفّل ..ولا اظن يحصد اليشتل
    تصــد مــرّه وأعاتبــها .. تراضيني وترد تجفــــل
    لا غلطه البدت مني .. ولا جلمه الكلت عنها ولا عني
    أهيم وما أقول أرجع .. تجي يمّي وتجابسـني
    أنام وحتى ساعه أهجع .. تجي بطيفي وتفززني
    وأحس بحرقه بضلوعي .. وتضل تدي وحنيني اتصب
    وأقول هاي هم قسمه .. زغيره وما تعرف تحب
    جثيره أيام مرت وآنه هالحاير .. لا شوره تدليني ولا شاير
    واشوف الناس كلها عـزاز .. وآنـــــــا اوحيـــدهم بايــــــر
    اشـــجاني واشحصلت منـــــها ؟
    أوادم وشت عليّ .. مثل ما وشـــت عليها ؟
    لا ماكو عواذل .. العواذل ما تحاجيـــها !!
    عرفته اللي كــان واشـــيها .. !!!
    ولك يا صويحبي استاذي يحـوم ويـدور عليها
    تحاجيه ويحاجيها .. تناغيــه وينــاغيها
    أقول يا صاحبي اسندني .. أشوف الدنيا تتل بيا وأتل بيها
    وإلا استادنا ريّض .. يقــــول هالنـاس شعليها
    حســــافة اســـتاد .. جنك ما دريت بحسبتي وياها
    حســــافه اســــتاد .. قلبي اللي هواها شلون ينساها
    شــكَول عليك يا استاذي .. شــريد أدعي ؟
    عسنك بيش
    بالحسرة التحز بكَليبي وبضلعي
    بالعبرة التسيّل عالوجن دمعي
    بالضحكات بالجلمات علمعبر
    نار وبالضلع تسعر
    عسنك بيش يملذون يلن كل جلمة بالدفتر تذكرني بهواك اكثر
    واذكرنهة احبنهة
    وحك عيناك يا استادي وعلي الشرجي احبنهة
    انشد عليك أبو حزامين لا توصل بعـــد يمها
    شـــتريد انطيـــك شـــهديلك ..؟
    الك قلبي وقــلبي عوسج ابهمها
    الك روحي وانت الروح ظالمها
    تريض وانعل الشيطان .. واسمع نخوة افادي
    لو هذا الحجيته وياك ما ينحاج يا استادي
    خل يشهد علي الهــادي
    احرم عليك حتى طبة النادي
    وشحدهة وتكَلك طب ... زغيرة وما تعرف تحب
    اشوف الناس كلهة الناس تركض علسراب تكول هذا الماي وما مش ماي
    وانا عليمن اكَنطر داي فوكَ الداي
    ولفي وما يهمة بجاي
    لجن انا يا بعد جلاي موش استاذ
    ولا بيدي امر ذيج وهاي
    وما اكَدر انجحنها لو سـاعه اضحكت ويــاي
    ولا أقدر اسقطنها إن صــدت تـريد جفـــــاي
    انا منين أجيب الشهادة منين وارضي بيها هواي
    وأنا حسره عليّ يا استادي شربة الجاي
    بس عندي قليب يا محلاه .. ألف حسره تحس بجلاه
    وعندي تركه من بقايا الروح جثيره جروح وتصيح الدّاد
    ما جاني برقبتك يا استاد
    جرحي ما يلفه ضماد .. ولا اظن قصتي على البشر تنعاد
    هذي قسمتي من الله مو من واحد واعتب .. زغيرة وما تعرف تحب


    رد الاستاذ:

    عيش ابخت واحجي ابخت وبوكَ ابخت مكَرود يالمالك بخت
    صدكَ يالتنشد عليها ودمع عينك حرام يصب
    صدكَ يا فلان زعطوطة زغيرة وما تعرف تحب
    زغيرة ولعبت علية زغيرة وعذبت كَلبي
    شفتها ابدرسي مو راحة تصد عين وترد تربي
    تشيل اصبعها بالعمدا .. شحلاة اصبعها يسبيني
    واحس بدمها اليدبي واجاوبها وترد تسال
    واشوف منادس الحلوات ياذيني
    واحاجيها واكَول لكَيت مكَصودي
    شحلاة الرد تدكَ ايدي وتسليني شسولفلك
    اخاف تطول سالفتي
    على ساعة لني غركَان ابعواطفها
    احبج كالت احبيب اريدج كالت اتدلل
    احب ذبة سوالفها اكلها شلون وانة استاد
    اكلهة شلون اطب لصف اخاف احجاية العذال لو واحد يخالفها
    يا عيب العيب كَالت غصبا على الناس
    احبك واعبد الدفتر اريدك واعشكَ الجلمة التسولفها
    مشيت برجل تستاهل الجنة اثاريها بكَبرها تطب
    صدك يالتنشد عليها ودمع عينك عليها يصب
    صدك يا فلان زعطوطة، زغيرة وما تعرف تحب
    عليمن تنخة ابو حزامين وتتهدد بعلي الشرجي وعلي الهادي
    وتريد تحرمني غصب من طبة النادي
    يا حيف عليك وانت مشورب وراهي
    ويكولون الفهم عندك
    ولك وين الفهم ياليفرض بروحة على محبوبة ؟؟
    الفهم يا فلان من يعرف معاني الحب على دروبة
    العشكَ يا فلان روحين وسط الريح مصلوبة
    العشكَ رد وبدل يا فلان
    لو بالكَوة جان صار العشكَ طوبة ..
    اعاتب .. والعتب ياذيني ويذبني
    اعاتب لجل عينك مو لجل وحدة تعذبني
    ترة انة هم مثلك ظليت مدوهن وحابر
    انة الظليت ارد للضيم جبحاتة
    انة الظليت ذاك الكَال
    لا ردنة ابو عليوي ولا بينت مسحاتة




    رد الطالبة
    جبيرة انة جبيرة وعدكم زغيرة
    زغير الماعرف امرة وتدابيرة
    زغير الوكَع حظة وبكَة بحيرة
    ولك والحبوا يكولون ؟
    لو مال الغصن حدرة يا طير اطفر لغيرة
    جبيرة انة جبيرة وعدكم زغيرة
    زغير انته ..زغير وماتعرف تحب
    نسيت شلون اتلكَاك من تجهب
    اهنا لاهي وماعرفت اشلون تلهة
    اهنا يساهي وما حسبت حسابك الهة
    ساعة الكَيك يم سوسن
    ساعة الكيك يم زهرة
    تعال اكرب اعتبنك ولو مرة
    تعال اكرب تعناني اشوفك جرحك اشكبرة
    تعال وصير عطابة
    تعال وجم تعال وما نفع وياك وانت على ضحجات العليلة
    شلون مسترطب
    هذا انت وتكلي زغيرة وما اعرف الحب ؟؟
    شنهو الحب ؟؟
    شتريد تكَول .. شتوصفة ؟
    المخلص يجيب الماي من الغيم لو لحظة عطش ولفة
    لا تطري دروب الحب عليك محرمة كلفة
    ادري بك طري ذبلان ادري بيك شبه سعفة
    تميل وية الهوة لو مال
    ماريدك بعد حيال ظل اسمع حجي العذال
    واشبع لوم كلمن كال
    المايعرف تدابيرة حنطتة تاكل شعيرة
    جبيرة انا جبيرة وعدكم زغيرة
    هذي قصتي وية فلان .. لاجن دشوف اشجان
    استادي يصول يجول يدور ابحومة الميدان
    يعض اصبع يظل سهران .. عليمن ؟؟
    شنهو البدر مني وبان
    يا ناس اسمعوا قصتي
    شلت ايدي لجل فهم الدرس مو لجل حرشة غايتي
    وجيتك مرة لو مرتين للغرفة
    مرة توصفلي طريج الحل
    ومرة مدري اشجانت الوصفة
    يا عيب العيب تحسبهة سوالف شوكَ ولهفة
    خلف الله على الدلاك عايزهة بعد زفة
    حرت انة يهلوادم بين استادي والطالب
    من مثلي على الصوبين دتحارب
    بعت انه وشريت النوم ولاو فد يوم
    اريد الناس ينسوني
    اريدن تغمض جفوني
    حيرانة الدرب دلوني
    لا يوم اليمر يومي مو راح اشكَن هدومي
    يا ربي شلون هلحيرة
    جبيرة انة جبيرة وعدكم زغيرة
    تحياتي الباشه