منتديات نبع الفرات

تمت ارشفة منتديات نبع الفرات

المشاركات من الموضوع ايهاب المالكي للوطن اعوفك مثل ميت طاب للتابوت

  1. بواسطة فهد الزيادي

    اعوفك مثل ميت طاب للتابوت وارجع مثل زاير طاب للحضرة
    واجي عطشان الك لكن عطش رجلين كل خطوة بطريقك تنحسب قطرة
    وره خط الحدود الارض خضرة تصير وبعين اليحبك تنكلب صحره
    ما تكمل جمل من ارد اسولف بيك كل حجاية تطلع تنكلب حسرة
    نمنه بحظن غيرك ليش ترضى بهاي غيرك من علينه وحظنك شكبره
    ما لميتنه نزرع غصن زيتون بس لميتنه اذكر موضع نحفره
    الف يوسف رحل ماكف نظر يعقوب هم كالوله ذيب وصدّك الفكره
    اذا طارت حمامة من الغصن بالله ما تلكه ابتسامة بشفّة الشجرة
    يلفكدك ثكيل وحدّبت له ظهور واثار اليحبك واضحة بظهره
    بست ايد الشمس بس ارد اخلص الليل ليل بغير كاعك بالجفن جمرة
    سافرنه ورد والغربة ادين زغار رجعنه الزغار عله الورد خطرة
    ساعة اتذكرك تمسح نهار فراك لاْن بيها الدقيقة تضاعفت عشرة
    مثل وقعة بدر شوكي وليالي جفاك بيها القلّة كدرت تغلب الكثرة
    انه من اشتاكلك عالفطرة من الله مو لنّك حبيبي ومو لاْن عشرة
    انه ابالي اعتقد حتى الطيور البيك ماتعبر حدود بموسم الهجرة
    لتصدك فلا بالغربة راحة بال فك اوراق روحي وبالجروح اقره