منتديات نبع الفرات

تمت ارشفة منتديات نبع الفرات

المشاركات من الموضوع ابوذيات ضياء الميالي -

  1. بواسطة المراسل

    [صورة]






    الكلب مات وضميرك مات همين
    أهمن بيك وانت ماتهمن
    ترة الراقب الوادم مات هماً
    وشريف الي ستر حاجة اخية

    بالحياطين صرت امشي واردم
    الكلب ميفيد صدكوني ورة الدم
    وية الدم حرت مدري ورة الدم
    الوكت والناس تيهوهة عليه

    يهل مبعد بضعنك ونة ونة
    وترة غناي بغيابك ون أونة
    التمر للغير تالي والنوة النة
    وانا عثوكك مربيهن بأدية

    وحك الساكنين الشام وايران
    عفى عيوني يشوفن بعد ويران
    اخابرلك وخطك يدك ويرن
    الف نعل اعلى ابيك رد علية

    العتب شيفيد كلي من اعتبة
    تسد بيبان بيتك من اعتبة
    اليمن عن حقد لتضن من اعتب بي
    يجي ويطيب جروحي الي بية

    العالي شلتكة منة من توقعة
    بعت والزين منك منتة وقعة
    صك غفران الية من توقعة
    بعد لتضن يأثر شعرة بية

    الهوة لو شفت لونة ملزمنة
    درس ونريد عنك ملزمنة
    مل العشك منة وملزمنة
    الملل موضوع صار بهالقضية

    دمر كلبي لغرامة وصار دامور
    وانا بمرحلة حب مجنون دا امر
    خلف الله على سهرات دامور
    وكاس العرك هونهة علية

    أخذ روحي وترك كلبي ترك زين
    هواج اتقصد عضامي ترك زين
    اريدنج على حالي تركزين
    واذا شفتيني سلميلي علية

    عليك احرك بروحي وانتة ردني
    حبيبي انتة خذتني وانتة ردني
    اذا يكصر ذراعي وانتة ردني
    اكص الردن لو اكص اني ادية ؟

    وحك البيت واليمة والاعضام
    احبك وبكثر حزني ولع ضام
    يفز جلدي من اشوفنك والعضام
    ترجف بس تحط ايدك علية

    كلبي مو دمع بجفاك ون جب
    مثل مي اعلة جف سكران وانجب
    اسمعت تالي الزمان احترم وانجب
    وانا الناس امن امر تاخذ تحية

    سوة طبعك وحبك ماهيمنة
    ومعاك الروح راحت ماهي يمنة
    ترة اليمنة التخونك ماهي يمنة
    ولا اليسرة التخونك ايد الية

    دمعتي تروح وروحي من اهلهة
    ونا لعيني دمعهة منهة الهة
    سعيت اطلب الحاجة من اهلهة
    الحاجة وية اهلهة اكطعوا بية

    مسودن كلبي ماينفع وعض بة
    قهر سلم بهامي واعض بي
    عرجة قسمتي صارت وعضبة
    سودة مصخمة افترت علية

    اثيابي من جمرنارك دولي
    اجرحتني ومااضن ينفع دوة لي
    علية اشبيك متكبر دولي
    حبيب انتة شنو بالنسبة الية ؟

    ادكلك عظم ضلعي ونعمة
    واحسب نقمتك رحمة ونعمة
    اشوفك من تجي مجبل وانة اعمة
    واصير اعيون اذا مريت بية

    [صورة]