منتديات نبع الفرات

تمت ارشفة منتديات نبع الفرات

المشاركات من الموضوع يعجبني الجرح لو لاگه شمات ....

  1. بواسطة المراسل

    يعجبني الجرح لو لاكه شمات

    يضم روحه بحيث يبين التم

    وتعجبني السيوف بجف السباع
    ...
    يحمرها الخجل لو ما لكت دم

    اذا انت شفت لتكول ماشوف

    تحجي العين بلسان التلعثم

    شوف الفلح من تموت الورود

    بغير ورود هيه تروح تشتم

    بس شوف الورد لو مات فلاح

    من تشمه تلكه بعطره ماتم

    شوف اصعب وجه تقراه العيون

    لكن بالكلب بس الله يعلم

    كلبي كزاز بس تسحكه خسران

    اذا هو انكسر انت التصب دم

    الحسب عقله يحب صدكني يرتاح

    الحسب كلبه يحب صدكني يندم

    لذلك اني احب آدم ابو الكل

    بس ماحب ابو التفاحه آدم

    حسب عقلك يصاحب شوف كلشي

    واضربلك مثل عن كلشي وشلون

    اكو يحجون من الصبح لليل

    وحرام انجان تفهم شنهو يحجون

    واكو ساكت وحلكه مخيط خياط

    وحجيه شكد حلو بنظرات العيون

    من ابزك بالحجي لاتزعل ارجوك

    اسمعني وكول شكرا كول ممنون

    الابره من تبز الثوب يا صاح

    قصدها تخيط بشك اليشكون

    اطلع الروح اكو شغلات مرات

    بس مرات هيه تردلك الروح

    اذيه الباب من ينفتح للريح

    بس شلون لو بالسجن مفتوح

    كلش مو حلو قباض الارواح

    وحلو كون بعدوك يقبض الروح

    ابن ادم يضرب اللوح ابسامير

    لكن من يموت يشابكه اللوح

    اكو من الفرح يبجي حيل مرتاح

    واكو شابع ضحك بس هوه مذبوح

    اكو كلشي ما يملك عاش مرتاح

    واكو يملك الدنيه وعاش مسكين

    اكو يعوفك سنين وجنها ساعات

    اكو يعوفك دقايق جنهن سنين

    اكو بالگبر بس مو موته عاشو

    اكو مو بالگبر بس همه ميتين

    اكو ميباوسونك بس يحبوك

    واكو رب المباوس بس شياطين



    منقوووول للامانة