منتديات نبع الفرات

تمت ارشفة منتديات نبع الفرات

المشاركات من الموضوع حكومه الشمر العراقيه ....(بقلمي)

  1. بواسطة Rain

    [صورة]

    ان شاء الله الجميع بخير
    عذراً لأي شخص ممكن يقرأ كتابتي وينجرح احساسه
    اني هنا مااريد انتقد طائفه معينه ولا دين معين لكن رح انتقد اساس الظلم والفساد بمجتمعنه
    يمكن موضوعي محد رح يقراه وممكن ميأثر أي تأثير بأي سياسي لكن اني رح اكون سويت الي عليه وضميري مرتاح
    بالبدايه اني كنت مو كولش مقتنعه بالمظاهرات الي ديسووها العراقيين ويوميه يسدون الطرق وهوسه جنت اكول هذوله من كل عقلهم(عذرا الهم) لان الحكومه متسمع احد
    لكن الي شفته خلال هذه اليومين صرت اكول ماكو عراقي شريف يوكف ضد هذه المظاهرات ولازم الجهاد يصير بالمظاهرات مو بس بساحة المعركه
    لان يا ناس داعش مو بالانبار ولا بالموصل لكن داعش الحقيقيه هي بالحكومه

    كالوا راح صدام الطاغيه كالوا الي ظلمنه راح ورح يبدي عصر العدل وكل الناس ترتاح

    بس الي صار لعبه علينه كولش كبيره الي جوي بالحكومه مو شيعة اهل البيت عليهم السلام لالا
    تدرون منو هذوله؟
    هذوله اهل الكوفه الي بعصر يزيد اللعين الي دزوا رسائل للامام الحسين عليه السلام كالوله انقذنه من الظلم وبعدين علمود الفلوس وعلمود الخوف باعوا الامام عليه السلام واهل بيته
    الشمر مو هو الي داس على صدر الامام الحسين ولا الخيول الي داست
    الي داس على صدر الامام الحسين هم السياسين الي بأسمه موتوا الشعب من الجوع ومن الفقر ومن 2003 الى الان كولشي مسووا بس بوك ونهب

    يعني شنو العاصمه بغداد تمطر شويه كولش شويه بالنسبه لدول 24 ساعه وطول السنه تمطر عدهم مشفنه عدهم ناس بيوتهم غركت؟
    ولا شفنه عدهم ناس ماتت لان انصعقت بالكهرباء
    ولا شفنه ناس وكعت بيوتهم عليهم وماتوا

    يعني شنو بالنجف ناس من المطر تموت وتوكع عليهم بيوتهم انت يا محافظ النجف انت الي يمك قبر الامام علي عليه السلام
    متخجل من نفسك؟ شنو هم تزور الامام عليه السلام وتقره الزياره لا اني اكولك ارجع اشرفلك لان الامام ميتشرف بهيج وجوه تزوره
    شنو عائله بيها 7 نفرات يوكع عليهم البيت لان فقره ماعدهم يعدلون بيتهم ام و6 جهال ايموتون وانت ابيتك متهني

    شنو ميدنة الصدر تغرك وشاب بعمر الورد ينتل ويموت؟
    وينك سيدنا مقتدى الصدر انت وجيشك تكدرون تهدون الحكومه بيوم واحد ليش المنطقه الي تشيل اسم ال الصدر هذا الاسم الي يهز عروش وهز الطاغيه صدام
    هيج الحكومه تجازيهم؟

    وانت السيد عمار الحكيم مو انت نص الكراده صارت الك وينك؟اشو المي وصل لبيوت الناس وكولشي مسويت الك اشخاص بالحكومه كولشي مسووا حالهم حال الاصنام الباقيه



    وانت يارئيس البرلمان الي حاير ادور على منو هدد يونس محمود احترامنا ليونس محمود شخص شريف مستعد كولشي يسوي لبلده بس انت عايف النازحين والاطفال الي ماتوا من البرد
    وكاعد ادور هيج شغلات والله عيب عليكم

    وانت صالح المطلك الي فرحان بس تحجي بالفساد وين فلوس النازحين؟وينها بيوتهم وينها كرفاناتهم ؟ اخذت فلوسهم ويوميه مسافر بمكان وكاعد تحجي بالفساد يداوي الناس وهو عليل

    وانت عيني رياض العضاض رئيس مجلس بغداد تكول المطر الحمد لله غسل الشوارع والاشجار وتخلصنه من الاتربه والجراثيم صدك متخجلون من نفسكم والناس الي غركت شنو كلهم ذنبهم برقبتك الى يوم القيامه

    وانت يا رئيس الوزراء فرحان سويت تعديلات بالحكومه شنو سويت؟قللت رواتب الناس؟ وانت كل السبب لان ماعندك الشجاعه تكول كدام السياسيين والبرلمانيين عيب علينه وكافي
    كافي نبوك هذا الشعب المسكين كافي غركنه الناس وموتناهم جوع

    يعني متكدرون تكولون لمدة 6 اشهر منستلم رواتب حتى نعدل البلد شويه عيني حتى لنكول ظلمناكم نص الراتب انطوا للفقره او سووا بيه مشاريع حتى لنغرك مره ثانيه شوكت تحسون

    العراقيين الهم الله مالهم غيره

    الموضوع وجهة نظري الشخصيه مو وجهة نظر المنتدى

    تحياتي

    rain
  2. بواسطة Alforati

    احنا بهرجنا ومرجنا وانتقادنا لالب السلبيات جاي نتوقف عن التحرك ونظل نتعارك
    هذا هيج وهذاك هيج ومحد جاي يسوي حل
    هجمات شرسه عالعراق بكل طوائفه ولكن للاسف محد جاي ينتبه
    العراق الان مفلس تماما والبطاله متفشية بالاضافة الى مستوى التعليم منهار
    والعولمة الالكترونية الغبية سيطرت على عقولنا ومنظور (( على حس الطبل خفن يرجليه )) زاد الطين بله
    والشعليه معليه كذلك
    والمحسوبية والانتقاص منفكرة لاتناسب مصلحتك طامة كبرى
    يا اخوان
    خلونا نسوي تجمع لطرح الحلول
    اعمارنا ليست مقياسا لوضع حلول
    يمكن يطلع من تجمعنا البسيط فد حل ينقذنا من هالبؤس
    ليش نظل كله عالحكومة والمرجعية (( اقصد وضع اللوم ))
    صحيح ماوضعته الاخت رين من كلام هو عين العقل .. ولكن لنجد حل بدلا من التذمر والانتقاص
    الاخت رين فتحت عيوننا على مواضيع جمه قد نتفاداها ولكن
    تكاتفوا مع الحكومة ((( واقصد المصلحين الحقيقيين الذين دعمتهم المرجعية ))) وانتبذوا الاطراف الاخرى وحلحلوا النزاع
    انا مع الحوكمة الوطنية المصلحه للفساد
    هذا شعاري
  3. بواسطة Rain

    عزيزي شنو ننتظر من الحكومه مابيها امل
    الامام الحسين عليه السلام هو قدوتنا صحيح؟
    لما شاف الامه رح تموت لان كلها ظلم وفساد قدم نفسه حتى يصلح الاسلام صنع للاسلام تاريخ
    لكن الى متى نضل نقدم ارواحنا وارواح هذه المساكين تذهب سدى دون اي حلول
    ماذا يفعل الشعب وهو ليس بيده شئ؟
    لا مال ولا مشاريع ولا تعليم شنو تريد من شعب هيجي يسوي
    احنه اذا نبقه بضل هاي الحكومه بعد 10 سنوات ينتهي العراق من الوجود يبقه بس التخلف والجوع بيه
    العقول كلهم طلعوا لان ملكوا ترحيب من الدوله
    المزارعين بطلوا يزرعون لان كولشي مستورد
    المصانع كلها واكفه وكله استيراد وكومه شباب عاطلين عن العمل ليش؟
    تدري شنو رح يصير بالانتخابات الجايه نفس هاي الوجوه الي تشوفها هسه نفسها هم رح ياخذون الحكومه نفس الوجوه من 2003 نفسهم مع تغيير بسيط يجيب بمكانه اخو لو ابن عمه
    تدري ليش؟لان هاي الحكومه متخلي احد شريف يقدم على الترشيح للحكومه الا عنده حزب منريد احزاب نريد نصوت لشخص بلا حزب وماكو ميخلون هيج شخص
    اعتقد بعد الوطنيه خلصناها
    المرجعيه هي صمام الامان لو مو السيد السيستاني جان هسه داعش بكل مكان بس الله ستر
    المرجعيه بريئة من هاي الحكومه
  4. بواسطة Alforati

    سلمت اناملك اخت رين
    والله يستر فعلا
  5. بواسطة Rain

    يكولون نهاية هذا الاسبوع رح تصير امطار اقوه من الي صارت خلي اشوف الحكومه شنو حتسوي
    واليوم العبادي رايح مفتتح معرض بغداد الدولي؟!
    كرة عينه
  6. بواسطة العراقي راقي

    تسلمين
    شكرا جزيلا لطرحك
  7. بواسطة Rain

    الله يسلمك
    شكرا للمرور المميز
  8. بواسطة Alforati

    هي واجباته متعددة
    المفروض يعلن حالة الطواريء ويعطل ابرلمان وينطيهم مدة اربعة اشهر لحل البرلمان نهائيا
    وبعدها يشكل حكومة ازمة ويسوي انتخابات مبكرة
    وعلى اثرها يدمج الحشد والعشائر بالجيش العراقي وتحت الوية مصنفة كلمن حسب تنظيمه السابق
    ويسوي سلاح ارضي للعراق غني عن التعريف
    بيها هواي اضرار هاي الخطوة ولكن لاتتجاوز السنة ويرجع يعتدل الوضع بالعراق وانا الضامن
  9. بواسطة عشاق الولاية

    احسنت عطاك الله العافية
    وان شاء الله تنحل ازمتكم يارب

    تحياتي {عشاق الولاية}
  10. بواسطة ام بنين

    كل اللي كلتي صحيح وعاشت ايدج كلمة حق محد يكدر يكولها بس منو يسمع !
  11. بواسطة Abbas Al-iraqi

    [صورة]
  12. بواسطة ضياء الصافي

    فلنصلح أنفسنا أولاً
    لعله هذا بلاء علينا لتركنا كل مايريده الله
    لاننا مسلمون وموالون.
    وكل ما ذكرتيه فيه من الواقع شي لايستهان به.
    ولكن هذه أخطاء ورعونة الحكومة السابقة لِما أحدثت من خروقات وتمادي وضرب شركائها, وسجن المقاومين منهم الاشراف
    وترك المفسدين يصولون ويجولون , وتقريب البعثين الانجاس للمناصب العالية.
    والله على الظالم
    والفرج قريب بإذن الله..
  13. بواسطة Rain

    شكرا لكم جميعا على هذه الردود الرائعه والقيمه التي تدل على عقول واعيه
    شكرا لكم جميعا
    انرتم:t4409: